取消「恆人專用區」

2013年11月21日,油尖旺區議會交通運輸委員會通過縮短行人專用區開放時間
(截至撰寫本文時,仍未有會議記錄,不過有會議錄音,有興趣者可參考。)

由建制派把持的區議會,向來無好感。(但有事,當然仍會投訴,要佢地跟進--大佬,雖然票就唔投俾佢,但有份交稅出糧俾佢地,要佢地做嘢係天經地義。)今次,很罕有認同他們的決定。

我絕對無意探討政策利弊、是否妥當,諸如此類:太麻煩。

我也不太關心行人區內居民,究竟是否喜歡行人專用區。(有,又嘈、又煩,絕對唔好住;不過唔好住,可能租金相應會平;如果變得清幽咗,住宅租金可能會升。)其他途人點諗,亦唔關我事。(同埋,大佬,你路過之嘛,有你就行,無咪唔好行囉;成日話要下放權力俾區議會,咁一定係考慮區內居民優先,係好正常、好合理。)其他寬頻佬、舖頭、「表演」者、即影即有… 我通通唔想理。(唯一要講擔心,我係唔多想「圈圈功」少咗個地方擺檔;我有少少懷疑哩個係咪真正目的。)

我只係,以行咗旺角十幾年嘅路人身份,口痕,想發下嚕嗦。

中學時行旺角,當然無「自由行」,本身已經係舒服好多。不過,嗰時無所謂「行人專用區」,得兩邊行人路,就算人多,都好順暢。(當然,都有部份原因係… 好多人會行上馬路,人車共用。)主要原因,係大家都好有共識:路,係用唻行嘅!

以前行旺角,係好有效率。其他人可能會去買衫,但係我向來都係去買卡、買CD、買書、買漫畫、買公仔、買雜誌、買寫真集,偶然行吓電腦商場。主要目的地,係信和、樓上書局、旺電,目標明確。

其他人,當然有其他目的地,行不同方向;但大家都明白,我地出旺角,係要去「目的地」,而街道,係用唻連接各個「目的地」,俾你「通過」的地方。大家都同意的規矩是:如非必要、緊急,不要停留!亦不要突然反方向行!

形象化啲(「物理宅」啲…)講,以前的「旺角共識」,係行人應該好似中學教「經典力學」咁樣,好似桌球波咁樣,係好有規律咁移動,可以簡單預知;但今時今日的旺角行人,就好似浮在水面上的花粉一樣,以不規則的「Brownian motion(布朗運動)」移動,完全無定向。

「Brownian motion」,喺旺角哩個咁擠迫的地方,令人極度困擾。我行喺你後面,本來大家均速慢慢行,忍一陣總會到目的地;但前面,忽然停低,我又唔可以繞過你(無位呀,大佬!),咁點?之後左邊又忽然有個人向右轉,行兩步,又停低,想點!?

你改變主意,想改方向,可以,忍到路口先轉方向行過啦。有無聽過「人潮管制」呀?以前嘅旺角,就係美妙在,大家都有「人潮管制」的共識,自動自覺,保持通道效率!

而所謂「行人專用區」,最令我不滿,係已經變質為「恆人專用區」!

我記得,細個學「行星」同「恆星」,讀到好亂,因為兩個字同音。(見到書面字,通常都會讀「行動」個「行(hang4)」,唔係「行唻行去」個「行(haang4)」㗎嘛;咁就同「永恆」個「恆(hang4)」同音!)

後來,如果特別有需要區別,會讀「行(haang4)星」,因為「行星」,係會「行(haang4)」;而「恆(hang4)星」,就(相對地)「恆(hang4)定」喺中心,唔郁。

而「行(hang4)人專用區」,其實應該都係俾人「行(haang4)」㗎!

而家,好多人變晒「恆(hang4)人」,企喺路中心聚集(原因,如果你有份,就心知肚明。),咁就大家都唔洗「行(haang4)」啦!可以「永恆」停留喺喥,直到永遠!直到時間盡頭!而「目的地」,係永遠都去唔到!

當「行人專用區」,已變成「恆人專用區」,我寧可回復原狀,免得眼冤。

唔好賴晒落「寬頻佬」喥。其實人地要做生意,係要多人流,所以「寬頻佬」反而相對克制。雖然一街都係,由街頭到街尾都見,但基本上都只係一人兩三個易拉架,一個簡單企位檔,貼近行人路邊,不太擋路。(我再重申,其實好合理,一諗就明:「寬頻佬」係想多啲人經過、多啲人見到,同佢簽單,咁點會擋你條路、倒自己米!?佢地要霸個位,等你見到,但係又要俾到你行,咁先多機會做生意。所以賴「寬頻佬」阻街,真係罔顧事實。佢地係「小奸」,但絕非「大惡」。)

邊啲係「大惡」?

一個檔口成間舖位咁闊,用三腳架圍起十幾平方米。
一個人,放一塊八米長、米半闊膠布喺地下。
高分貝,長時間聚集一大群「恆人」喺路中心。

..

結果,唔止要上返行人路先「行(haang4)」到,更經常有「恆人」侵佔行人路,整個路段,幾乎失去作為「通道」的功能!

回復原狀,取消「恆人專用區」,其實是好卑微的要求:

「大佬,俾返條路唻行吓吖!」

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s

This site uses Akismet to reduce spam. Learn how your comment data is processed.