《那夜凌晨,我坐上了旺角開往大埔的紅VAN》

《那夜凌晨,我坐上了旺角開往大埔的紅VAN》電影海報
(來源:Wikipedia;公平使用/公平處理)

其實,套戲都未完!

我無奢望個個入場前,或個個影評人落筆前,都要睇過原著。不過,任何自稱寫影評既人,稍有責任感者,都應該會做少少功課。而只要唔係太懶、或太蠢,都應該可以搜尋到相關報導,大概內容係講:「陳果打算將部小說拍成上下兩集,不過因為資金問題暫時只拍了上集。」咁既然打算有下集,今集當然要留返條尾啦。

(大佬,你睇《魔戒(The Lord of the Rings》,Frodo都行咗三集先掉到隻戒指落火山啦,你唔會睇完第一集就問:「又話要掉隻戒指落火山嘅?」亦都係同樣原因,三集都有得提名奧斯卡最佳電影,但係要到第三集先拎到:你頭兩集係好睇,我都要等你出埋第三集,先知你完唔完整、會唔會爛尾吖嘛。其實,上中下三集夾埋,先真正係成套戲。)

咁所以,見唔少評論話套戲爛尾… 其實成篇文立即唔洗睇落去--你連啲基本嘢都一嚿嚿嚿,仲邊可能有說服力?咁所以,哩套戲,無論你係想入場睇又好、睇完想講又好,要記住:其實,套戲都未完!

咁一套未完既戲,可以點講呢又。

要知道,這是改編作。咁改編,視乎情況,程度有差,但一定跟原著有點出入。始終是兩種不同的媒介,表現方法不同,又可能有唔同既嘢要講,當然會有改動。而哩套,小說本身雖然不錯,有啲位亦係幾正,但當中亦有不少犯駁矛盾之處,要成功改編則更要修改至合理連貫,都幾大工程。

原著小說最成功者,不是其規模大小,亦非情節是否合情合理(我都提過話係有犯駁之處),而係其氣氛、人物及事物,尤其是故事中出現的幾款「典型」香港人。能否把握到這點,是評鑑的主要標準。而陳果在這一項,得分應甚高;從看戲當天現場觀眾反應推斷,抱此看法者不獨我一人。有一兩處改編,更是一舉兩得,既令故事/行動合理,又可加強其政治諷刺。

例如:林雪演小巴佬,真係好正;著董太衫一幕,就是一舉兩得。

(我係唔想多講,爆咁多你唔洗入場睇啦。有啲位係有少許冗贅、無謂的感覺,但本土味濃烈,香港人睇到會明、會笑,雖然以戲論戲可能影響節奏,但我又覺得瑕不掩瑜,都睇得過。)

人物背景,書中少有交代,戲中補完。有啲比較陳舊老土,但全部拼埋都幾有味道,算不錯。而播、解《Space Oddity》那一段,拍得好,比書中描寫豐富得多。

不滿者,反而是開場不久,在車上討論的情節。那一段,跳得太快,人物的行為、反應,似不太合理。而後段,亦太鬆散隨意。一段動作飛車場面,似乎可有可無,又拍得不太好。而且,後段忽然回到太土炮、CULT片的風格,跟早段不配合。

不過無論如何,今套只係上集,究竟能否收尾,一切謎團能否解決,仍是未知之數。

咁所以,哩篇文都一樣,只能夠係未完待續--如果有得續。

==

簡單評分:

無,套戲都未完!

《那夜凌晨,我坐上了旺角開往大埔的紅VAN》 有 “ 2 則迴響 ”

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.