《救參96小時 3(Taken 3)》

Taken 3 Film Poster
(from Wikipedia;Fair Use/Fair Dealing)

新一年看的第一部戲,唔多得--其實亦係「預咗」,第一集緊張刺激,第二集完全翻炒,第三集再無人被擄,已屬萬幸。(新年假期揀戲困難,因新上映的戲都不算吸引,隨便入場亦只因「得閒」,打算漁翁撒網。結果,最好看的一部,是上年年末開始作有限放映的戲。不過,新年想寫新戲,去年的戲其後有心情再說。)

入場時期望不高,如果交出一套好看的動作片,我已經收貨,可惜連這低標準亦未達到。

戲中有兩段主要動作場面:其一為公路追逐打鬥,其二為闖敵陣大鎗戰。
(唔入場你都估到會有啦,唔算爆雷啩。)

前者的問題,是太論盡。早兩集咁威,何以今集搞幾個差佬咁大費周章?追逐期間破壞之大,完全超過整部戲所有奸角之總和,亦有連累(大量)無辜路人之罪過,喪失「合乎比例武力」的正義形象… 之餘,兼令觀眾對其能力有極大疑問。要做英雄,要動作爽手,快、狠、準,先夠有型,哩一段三項全失。

後者的問題,首先都有前者的問題--動作不夠爽。另外,陳舊無聊又是失敗。升降機、保安室、閉路電視,玩到爛喇… 到走廊,繼續唔夠型、唔夠瀟洒、拖泥帶水。入到屋內又顯不出架勢,一對一竟然要花如許時間。有人會認為鎗戰部份唔合理,手鎗對自動步鎗已非常不科學,奸角點射都唔中,主角威能太過份。誠然,都是事實,但我覺得實屬次要。如果夠型,合理與否不重要--畫面夠好看,你根本不會問、不會想是否合理。問題是唔型、問題是唔好睇。

Mark哥楓林閣鎗戰都非常不科學,唯一比較合理處係隻腳中鎗跛咗,不過型到震,咁邊有人理佢科學唔科學?

另一問題係劇情太弱智又老土。差佬唔查案唔奇、唔識查案唔奇,反正十套戲有九戲都係咁,否則如何顯出主角有用?而且差佬向來又懶又馬虎,是世界共識,有一個疑犯出現就最好,會全力釘死佢,唔會再查。我可以接受。不過主角都唔見得有腦,咁先大鑊… 有啲查案原則,睇推理小說者必然熟知:謀殺首要查熟人。簡直是常識吧…

老土方面,當以以身犯險、親子見面那一段為代表。如此橋段簡直拍到爛… 而且「伏線」太唔「伏」,著跡得很,一整段都很難看。

其三是格局太細。我明白,已拍到第三集,一來想要變化,二來主要目的是榨取剩餘價值、盡量縮皮掠水--不過首兩集跨國四圍走,格局大、又有靚景,今集都不能太失禮。就算要回歸美國本土,起碼都要穿州過省吧!無,完全無。最宏大的一幕,只是得公路追逐。(或者,加上有直昇機出場亮相那小部份。)簡直是騙局!這是電視動作片規模而已!

全套戲最好看,是主角一眾伙伴,本身設計有型,但顯不出功架,反而有點失威…

入場看動作片,預咗將個腦放喺門口,只要場面好看、夠緊湊刺激,少許不合理是可以原諒的。可惜這部戲全部不合格,毫無新意,只得Liam Neeson賣型挽回少許分數。

==

簡單評分:

C- -(☆☆★)

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s