《聖杯騎士(Knight of Cups)》

"Knight of Cups" Film Poster
(from Wikipedia;Fair Use/Fair Dealing)

(畫面影住一個keyboard,非常普通平價嘅無線keyboard,煞有介事咁,以極慢速推近,好似喺成大缸原油喥游水咁嘅速度,一陣黏膩噁心嘅感覺。配樂,音樂我唔懂,隨便啦,想像一曲故作宏大,空洞無物嘅罐頭音樂,聽完即刻就會唔記得嗰種,應該就啱㗎喇。)

哩篇文,根本係唔應該寫出唻嘅,應該要讀,要讀出唻。或者可以借用梁朝偉把聲,偶爾又可以用張國榮把聲,隨意交錯運用,都可以。其實我甚至唔知點解要入場睇哩部戲。幾年前睇過《生命樹》,我已經知道同哩個人係唔夾,唔啱「chan佬」(channel),夾硬唻,都係無好結果嘅。

不過一得閒,身痕,卒之又入咗場睇。

我究竟睇咗乜撚嘢呢?庸俗,虛飾,空洞,無聊… 太文雅都係唔多到肉,不如兩隻字--扮嘢。屌你扮乜撚嘢啫。點包裝都好,根本就無嘢好講,甚至無講過嘢。係,一百一十八分鐘,係無講過嘢。演員不停獨白,講好多嘢,但其實又無講過嘢。

(開始有啲悶,換過個畫面,隨便一個完全唔關事嘅畫面。比如,一個白色,極空曠嘅房,房中間有一個屎塔,馬桶,或者一個尿兜,用無影燈照住,又係煞有介事咁極慢速Zoom埋去。或者用廣角鏡,甚至魚眼鏡,隨便喺公園搵棵樹,低角度影上去,再又係極慢速推上去。)

無論你搵幾多出名嘅演員,用幾有魅力的聲線,無聊嘅說話就係無聊,一句句文藝腔心靈雞湯,頂多就變成一樽樽心靈雞精,甚至只係心靈雞粉、心靈雞汁。不過,其實又唔怪得人拍哩啲雞湯、雞精、雞粉、雞汁嘅。咁有人buy吖嘛。雖然,又唔知其實係咪真心buy,可能只係扮buy。唔係點做文青呀,或者做文中、文老。

係,好似《國王的新衣》咁,你要識做吖嘛,個個都話明,個個都話睇到,個個都話套衫咁靚,咁你睇到又好,睇唔到又好,信人睇到又好,唔信人睇到又好,老虎蟹都要話:「睇到~!梗係睇到啦!邊會睇唔到呀,套衫咁撚靚,貴嘢唻㗎。」唔係點出唻行呀。

不過諗返轉頭,都未必真係「睇唔到」㗎,其實唔係講大話,唔係唔誠實,講得多,講得耐,佢吔可能真係信咗,真係覺得自己睇到㗎,仲睇到件衫好多細節,仲個個睇到唔同嘢添,喺佢腦裡面睇到吖嘛。細路唔係特別誠實,不過佢聽得未夠耐,未洗到腦,未識呃自己。

(再唻換過個畫面,今次去後巷舊書攤,泛黃嘅燈光,影住一枱過期鹹書,再唻用龜速掃過去,一來你掃得又慢,二來後巷啲鹹書無數咁多,總之影極都仲有。)

啫係,你最唔明係啲「懶」宗教意象嗰味嘢係想點。去睇相… 吖,唔係,係咪叫去睇相呢?塔羅牌,應該算係算命先啱。算到咁上下,忽然又有個人,喺處唔知算跳舞,定做咩儀式、祭祀咁樣。除咗扮神秘,真係唔知做乜㞗。總之就係,用獵奇眼光,走入一堆異國情調嘅人喥,好迷幻,好神秘。好無謂。

唔止,仲有佛像添,係更加唔知做乜柒。仲有… 耶教嗰啲已經費事講,成套戲都係,我又唔想默返成套戲出唻。啫係,雖然,都默唔出,又都唔想默得出,我比較想快啲寫完篇文,可以忘記咗套戲。

(不如轉下把聲,無咁悶。女聲,張曼玉如何?順便轉過個畫面,唐樓樓梯吖不如,無人嘅,無旗袍睇,由下面影上去,又係向前推,但慢到永遠都到唔到個轉角位咁慢,慢到你可以數到條水磨石扶手有幾多粒石米。)

其實我覺得,問題已經唔係佢識唔識講個故仔,甚至根本有無故仔,當住係有先都好啦,又或者無咪當睇實驗電影囉。但到底有無任何值得講嘅思想、內容,或者任何新鮮嘅表現方式,令人耳目一新嘅畫面。無,戲裡面係無任何一件、一粒、一丁點元素係有啲哆(唔識寫呀,「dit dur」啦總之。)新意、有啲哆深度。

前蝙蝠人、身邊所有人、佢吔之間嘅關係,真係無一樣唔係公式化到極點,擺返响三色台播,你係會屌到佢反艇嘅--又或者唔會,因為你一早預咗係咁㗎嘛。悶得死人。將哩啲腐臭不堪嘅材料,剪到七零八落,分成一個個章節,配上不知所謂嘅獨白,只係更加顯得造作。

耐唔耐cut過去嗰啲風景相,真係空洞無聊到幾難以置信。諗諗下,我覺得我根本睇咗一百一十八分鐘道地綠茶廣告。唔係話唔靚,都算靚嘅,膠靚囉,好大自然氣息、有空間感,高清,好啱用唻做wallpaper嗰啲囉,裝咗windows就跟埋有幾張俾你揀嗰啲囉。罐頭相。

係呀,我玩咗成篇㗎喇,唔係你以為上面啲括號係做乜㗎。係咪唔知我做乜㞗吖?無錯,套戲就係同樣咁不知所謂,唔知做乜㞗。

不過講返轉頭,係,唔好意思,我上面都有提過,但係結尾想補返講多次。唔知做乜㞗就唔係罪唻嘅,好多實驗電影其實都真係唔知做乜㗎,睇完係一頭霧水,不過做實驗吖嘛,係唔包成功、更唔包係完完整整嘅,最緊要係有新意,真係少少都夠,趣味就喺嗰喥,有時就係嗰少少新嘢就啟發到你睇嘢唔同咗。

哩部就係衰在無,了無新意。

==

簡單評分:

D(☆☆)
(我係想再畀低啲添㗎,但係有Natalie Portman同Teresa Palmer,睇佢兩個行唻行去我都睇得幾開心,反正唔知做乜,當睇寫真DVD囉,佢兩個出場嗰啲部份,每部份有返一粒星咁啦,夾埋就兩粒。)

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.