【偷懶唔諗寫咩系列】本週電影隨口噏三則:《無雙》、《小心幫忙(A Simple Favor)》、《毒魔(Venom)》

《無雙》

預告片有一幕,見 發哥 燒銀紙點煙,十足似 Mark哥 重出江湖,但其實到我入場時已經忘記咗,直至見到 史兄 寫咗封公開信斥責 莊文強 用哩一幕呃人入場,先發覺係無哩一幕,莊氏之手段實在極為低莊。我並非為此入場,但預告片那一幕確是非常有吸引力,特登拍唻放喺預告片,明顯是昆水。雖然港產/華語片弱勢,但用如此下作手法搶票房,只會丟失更多觀眾。

部戲「抄」味濃,抄咩就唔講,因為一講就完全穿橋(雖然,其實應該睇到一半都感覺到係咩事),如果想知,一 search 就有;但「抄」,本身未必算是問題,問題是抄得唔好、砌得唔好。部戲頭半還好,氣氛有,周潤發亦能壓場,緊湊地推推推,少少瑕疵都不覺眼。但到中後段那一大場叢林駁火,完全無厘頭,極度突兀。最後揭謎底,又兜唔到,欠說服力。

更攞命係個結局。(我唔係講最尾扭嗰一筆。)為了照顧某北方市場,要「邪不勝正」,主角忽然弱智,女角又更顯平凡無味。

或者跟呃人預告片一樣,其實都係同一個病:錢為上。

==

簡單評分:

B(☆☆☆★)
(其實都唔差既,而且難得 周潤發 有返部正正常常既戲,都可以入場。)

###

《小心幫忙(A Simple Favor)》

有 Blake Lively!仲有 Anna Kendrick!
有 Blake Lively!仲有 Anna Kendrick!
有 Blake Lively!仲有 Anna Kendrick!
有 Blake Lively!仲有 Anna Kendrick!
有 Blake Lively!仲有 Anna Kendrick!

Blake Lively 同 Anna Kendrick,是但有一個,都已經有二萬個理由入場。有齊兩個,而且完全由她兩人擔戲,極少其他人分薄出場時間,簡直有十萬個理由入場!總之,因為有佢兩個,部戲已經完全值得睇,正。

==

簡單評分:

A++(💘💘💘💘💘💘)
(本來一個已經值五至六個💘,兩個理應不止此數,但 ななせ 套戲都只係俾咗七個💘,所以又唔可以多過七個💘,打平七個💘都唔得,所以照舊六個💘。六個💘+六個💘=六個💘。)

==

正經講兩句套戲。

雖然條橋其實好明顯,但入場前爆到一清二楚又太無趣,所以唯有忍口唔講。不過部戲最好看其實並非扭來扭去的真相,而是兩女又親密又互相利用的明爭暗鬥。Blake Lively 固然企出唻已經有壓場氣勢,上半場完全主導局面;但 Anna Kendrick 則在下半場慢慢爬上去,鄰家風,有啲煩,但又可愛,用韌力搭夠。

雖然是小說改編,但部戲簡直似為兩人度身訂造,能各自發揮其風格和魅力。尤其 Blake Lively,多種不同風格造型,襯上學校、屋企、公園等幾處場景,奇異的畫面令人意外,效果極佳,還真想不到任何其他演員有如此氣質。Anna Kendrick 亦貫徹慣常的 underdog 主角風,尤其… (雖然不似讚美,但我是真心讚美。)土氣衣服造型好襯。選角已經贏咗。

兩人談心或交鋒的場面火花四濺,故事稍有瑕疵都已無所謂,反正入場只為看兩個女角。非常滿足。

###

《毒魔(Venom)》

劣評如潮,但實際睇過又並非咁差。

頭半套,雖然節奏有點怪,Tom Hardy 亦似不太能投入這超級英雄世界,但以人物起源故事而言,都算正正常常,不太差。(不過,只算僅僅可以收貨。意氣風發期已經拍得不太有說服力,潦倒期又跳得太快… )

真正出事,是下半套。(雖然上半套已經有出事跡象。)

那奸角實在太廢及太悶,到高潮時完全完全無緊張感。而且 Venom 忽然自白,來得極度突兀,而且口講謂 Tom Hardy 令其改變,亦是完全無厘頭跳出唻,難以令人信服。而且早段明明講到,如果跟 symbiote 不配合,那第一號試驗品很快就死,後段又忽然可以隨便上身?等等。不能自圓其說之處太多。

好在有 Michelle Williams 可以攞分,雖然角色極悶極無聊,但後段有型過一次(雖然不見樣),而且格仔百褶短裙造型超吸引,又睇得好開心。(嗯,很明顯跟部戲毫無關係。)

==

簡單評分:

B- -(☆☆☆★)
(Michelle Williams 著格仔百褶短裙已經值一粒星。)

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.