【偷懶唔諗寫咩系列】本週電影隨口噏四則:《阿拉丁(Aladdin)》、《友誼永錮(Greta)》、《去吧!女神兵團(ระวัง..สิ้นสุดทางเพื่อน)[Friend Zone]》、《不老的戰跡(They Shall Not Grow Old)》

《阿拉丁(Aladdin)》

噢,其實無睇過 Robin Williams 配燈神的原裝版卡通電影,只零星睇過後來的電視版卡通系列,一路都以為《阿拉丁》的賣點是 Jasmine 好可愛、Jasmine 好可愛同 Jasmine 好可愛。(阿拉丁就擺明係閒角啦,邊有人理佢架。)

無比較之下,Will Smith 睇落都可以啦,不算非~常精彩,但實在不錯,而且佢似乎玩得最開心過癮。阿拉丁一如所料成個閒角咁啦,由角色到演員(和造型)都不甚討好。本來是有些少擔心 Jasmine,因為海報上的硬照實在唔多掂… 但當 Naomi Scott 在銀幕上郁動起來,原來又好可愛喎,著起那套經典的綠色衫都很吸引,令人眼前一亮。

結果,賣點果然是 Jasmine 好可愛,咁都可以收貨啦。

==

簡單評分:

B(☆☆☆☆)
(不過不失、普普通通的廸士尼片咁囉,舒服、特技漂亮、有唱歌[雖然我唔鍾意聽]、有跳舞,安全穩陣,你預咗入場睇咩就係有咩,無驚喜無失望。唯一值得提的只有 Naomi Scott 而已,選角真的不錯。)

###

《友誼永錮(Greta)》

部戲本身無咩好講,非常悶,完全無拍出來的價值,簡直浪費資源。老土,公式,由畫面到演出幾近無一可取處。臨尾營救脫險,本身已經好老土同明顯,刻意唔影樣更加低能之至。(而套戲唯一可取處,就係嗰一段 Maika Monroe 幾型。係咁多,無喇。)

故事由執到手袋,自己親身拎去還俾人,又俾人氹入屋飲咖啡同傾計,然後又越來越親近開始,然後慢慢變得可怕。大概有九萬套驚慄片都係咁樣發展,本身不值一提;反而係:點解有咁多套作品都係用類似大橋先最令人不解。

喺地鐵見到有人漏低嘢,唔洗理佢,等佢自己走返轉頭執又好,去到尾站等職員執起又好,總之會有應該負責的人理啦,你理佢做乜呢?就算你手多執起咗,拎去站務處又好,拎去警署又好,總之都係有應該負責的人會理會啦,你咁多事做乜呢?路不拾遺,唔止係你唔好貪人啲嘢,係根本就唔好搞啲嘢啦,要搞要負責既人會搞返啦,你搞佢做乜啫?

到自己親身去拎到人地門口——其實去到哩一步,無論主角遇到任何麻煩及凶險,俾人捉又好、劈開十九碌又好、塞入石油桶沉落東京灣都好,我都已經覺得完全唔抵可憐,基本上係自己攞唻,抵死——但其實,去到哩一步係未完全陷入危險既,你要自己拎返個袋俾人,咁你咪拎返同俾返囉,放低就走啦嘛,做乜又要入屋呢?更加抵死。

然後,哩啲角色永遠都會好投入同陌生人傾偈。又係,咩怪人、鬼怪都好,係你自己惹返唻,抵死既。做咩同人傾偈呢?唔鬼理就無事啦。之後仲主動保持聯絡,加倍抵死。

無數咁多部戲都係咁,但其實見到唔知咩嘢唔關你事既,見到啲唔關事既陌生人,唔理,件事已經完咗,成套戲唔洗拍。點解可以拍咁多套戲都係咁,咁多個角色都係咁中伏,更加無厘頭係——點解咁多個編劇都會覺得哩啲自己拿屎上身的主角會有觀眾可以代入及/或同情呢?完全不能理解。(有人肯出錢拍固然又係奇怪。)

==

簡單評分:

D-(☆★)

###

《去吧!女神兵團(ระวัง..สิ้นสุดทางเพื่อน)[Friend Zone]》

典型俊男美女愛情片。(分類唻既,不代表對主角容貌的主觀評價。)仲周遊東南亞,又去泰國當地不同景點,拍到旅遊特輯咁,真係好典型。總之就情節老土,主要都係賣下靚人靚衫靚景,仲會特登寫啲情節賣下肉添(都係賣樣既一部份啦其實)。咁老土得唻,都砌得流暢,輕輕鬆鬆,無乜過錯。

可能收得,近幾年多咗好多泰國片上,不過入去捧場其實係因為有一大段喺香港取景。果然,喺外人眼中,香港就係霓紅燈招牌、飲茶同成龍。

==

簡單評分:

C+/B-(☆☆☆★)

###

《不老的戰跡(They Shall Not Grow Old)》

以一戰當年拍低的片段,配上老兵口述的經歷,剪輯、修復、上色而成,由前線士兵的角度看,頗有趣,選輯得好。不過純粹當看故事,中後段開始感覺重複,但或者前線膠著的戰事就是如此重複吧。又,科技進步令戰爭的形式大變,如此形態的戰事或許真的只有一戰留下來的片段了,這可能是最值得睇的理由。

至於反戰、戰爭殘酷之類,其實要知道戰爭殘酷,不用睇片段,用膝頭哥諗下都知啦,從來不覺得睇唔睇哩啲影象會有咩分別。再者,除非人類滅亡,否則一定會繼續有戰爭,一部、兩部或更多部戲,都不能改變此現實。睇,也只是純粹對歷史、軍事等等感興趣而已。

==

簡單評分:

A-/B++(☆☆☆☆★)

【偷懶唔諗寫咩系列】近兩週電影隨口噏五則:《Pokémon 神探 Pikachu(Pokémon Detective Pikachu)》、《圓美大盜(The Hustle)》、《殺神 John Wick 3(John Wick: Chapter 3 – Parabellum)》、《人心狗吠(Dogman)》、《極北(Arctic)》

《Pokémon 神探 Pikachu(Pokémon Detective Pikachu)》

主要就是入場看如何用 CG 將 Pokémon 現實化,其次就是看 Ryan Reynolds 配音了。不過,始終是兒童向作品,配音的對白也不能太過份(任天堂也不容許你亂玩比卡超吧,畢竟是連同人作品都管得極嚴的知名惡霸),雖然仍然有麻甩味道,但有些少到喉唔到肺。

後者算合格吧,不算太滿足,但也不算失望。前者,非常滿足,簡直可以做標準教材。將原本是二次元的幻想生物化成三次元,那就忠實地去想像,原本的樣子、原本的比例、原本的感覺,放到三次元應該會如何,這就對了。其實是很簡單直接的一件事,不要手多就可以了,但「不要手多」原來是非常難做到的。(看近來出事的超音鼠就知道了。)

看到比卡超、傻鴨、噴火龍、金魚王、超夢夢等 Pokémon 變得如此實在,在銀幕上跑跳、與真人互動,但又有原本遊戲/卡通內的感覺,部戲已經有八十分打底,其他一齊都只是 bonus。(尤其,比卡超的毛皮畫得甚佳,質感真實,又保留可愛感覺。這種毛茸茸的表面,其實很容易出事,稍一不慎可以變得很詭異。例子:近來隻超音鼠咪係囉。)

臨尾的大陰謀部份,彷如重現 1989年 Tim Burton 版《蝙蝠人》中小丑的毒氣球,更感過癮。

==

簡單評分:

A(☆☆☆☆☆)

###

《圓美大盜(The Hustle)》

一街都讚的好戲無謂加把口,一街都彈的爛片都無謂踩多腳,只需要確認:果然好爛下,詳情可免。

咁其實一心入場只是為了看 Anne Hathaway,對部戲本身都無期望,咁又無欺場,大部份篇幅都有出場,而且 Anne Hathaway 依舊好可愛,近年又少見佢落力做無謂笑片,總之入場睇佢就當收貨啦。(雖然其他人都好惡哽。)

==

簡單評分:

D(☆★)

###

《殺神 John Wick 3(John Wick: Chapter 3 – Parabellum)》

兩個字講完:爽,型。

系列作很多時越拍越差,《John Wick》是少數越拍越好的,這部更遠勝前兩集。例如同樣賣爽、賣型的《Underworld》系列,開頭是好型,但後來越拍越爛。本來有啲擔心今集加 Halle Berry 的角色會累事,但她似乎回勇型返次。

前兩集其中一個問題是:講到 John Wick 好勁,但實際拍出來是笨手笨腳,完全唔夠爽手,似是靠條血bar夠長多過靠身手好。今集雖然都有靠HP多捱贏的問題,但整體打鬥比前兩集爽快俐落好多,一洗頹風。製作班底明顯自覺前兩集有此問題,今集甚至有角色吐糟謂 John Wick 點解咁慢手腳,是否因為退隱五年鈍咗?

此等惡搞成份,今集頗多。例如不停玩成個 John Wick 系列就係:「刺客 John Wick 俾人殺咗隻狗所以重出江湖大開殺戒掀起一場腥風血雨」哩一點,由對白以至情節都玩到盡。又搵 Keanu Reeves 講返《Matrix》經典對白:「Guns. Lots of Guns.」(打鬥高潮尤如《死亡遊戲》溝《龍爭虎鬥》,又唔算惡搞,但同樣係擺明玩。)

除了幽默,引到你笑,更重要是見得到作者好明白套戲賣緊乜嘢、要做乜嘢:爽,好玩,過癮,型,好型。情節、故事?理鬼佢。連戲中人物都一樣,無乜所謂,總之夠型夠好玩就可以。

所以逃走要去古董舖,無厘頭要砌把鎗,要用古典冷兵器對打,在紐約街頭要騎馬追逐廝殺,俄國黑幫要無厘頭在劇場總部排芭蕾舞,要打到去 Casablanca,搵人要去沙漠(好似拍礦泉水廣告定煙仔廣告咁),要切手指(Yakuza?),仲出埋忍者同奇門兵器。總之:現代感 + 異國風情 + 古典風美術,唔知點解,不過通常哩幾樣溝埋就型,咁所以套戲就照溝,同型咗。(其實幾集以唻都係咁,但今集玩得更大規模。)

咁拍咗三集,跟住仲明顯會繼續拍落去,究竟係講乜?刺客 John Wick 俾人殺咗隻狗所以重出江湖大開殺戒掀起一場腥風血雨吖嘛。無聊?係。理得佢啦。總之佢夠型,我睇得開心,食爆谷食得爽,乜都夠啦。

==

簡單評分:

A++(☆☆☆☆☆)
(其實更簡單講,成個系列都係中二病,不過係拍得好型的中二病。)

###

《人心狗吠(Dogman)》

有時,有些戲就是這樣:你明知是拍得好,客觀而言是好,但總是不喜歡。我不喜歡這部戲,但確實部戲是好的。(但因為不喜歡,所以又說不出謂部戲「好看」。)

尤其主角的角色,心腸似乎不錯,但又有壞習慣和貪心的一面,生活既有表面的部份,又有犯罪的部份,在惡霸面前,有時又靠其帶挈,但更多是受欺凌無法反抗,中後段陷入兩難的困境,到爆發。各個小節都拍得很好,那社區內的配角亦不錯,整個環境的氣氛都營造得很好。到最後收結,將屍體搬來搬去那一大段,很好。

客觀而言,我知道那一段是很有衝擊力的,將部戲各種複雜的情感,都濃縮到那一段,舖得很好,本身那個場景設計也好。但也只是客觀而言覺得應該如此而已,其實看的時候是無甚感覺的,根本我一直都不明白我為何要看這主角或這一堆人或這個處境,整部戲從來無投入過,所以感覺也不強烈。但我覺得九成是我問題而已,部戲本身是好的。

==

簡單評分:

B++(☆☆☆☆★)

###

《極北(Arctic)》

絕地求生片,多少都有點相似,今次特別在主角原本已在遇難地安頓好,可以長期留守等候,但忽然又有人遇難闖入此生活,才有後來的脫險旅程。旅程拍得尚可,但有趣處其實是由一人獨處,到有人相伴(雖然大部份時間根本完全無反應…),雖然都是意料中又熟口面,但效果倒是不錯。

可以一看。

==

簡單評分:

B(☆☆☆☆)

《薄荷糖(박하사탕)[Peppermint Candy]》

其實是上個月尾看的,電影節時因為撞時間無揀的修復舊片,竟然又有得上映,所以睇咗。其實已是當代名片,影評一堆,都無需要加把口,反而想借題發揮講其他事。部戲以一個人物為主軸,倒敍其人生的關鍵片段,片段之間用許多共通的細節貫穿,既是講一個人,又正好是講南韓那廿年的歷史。

熟悉韓國的人,當然會比一般人看得多,也能自動填補更多大環境、氣氛等等。但不太認識韓國的人,只當是看一個人如何由年輕有為,到生命中有點意外,以致心態慢慢扭曲,走上歪路、絕路,看人生的遺憾,也可以看。而就算不想太多,只是單純看他怎樣一層層的揭開謎團,也很有趣。又或者看戲中每一段,如何舖排,重複出現的火車和路軌等等,如何一環扣一環,也很好看。

這正是有趣的作品,和眼高手低作品的分別。

有趣的作品層次豐富,以多種不同的方法都可以看。有相關的知識、背景,可以看得多一點、深一點。(甚至,不同的知識和背景可以看到不一樣的東西。)但無如此外在的體系作基礎,單純看部戲內在,應該都是有趣的,又或者可以用更普世適用的角度去看。甚至,不想太多、太深,單純娛樂,也都不會覺得難看。

不止電影,愚以為各類型的創作應該都可以用這標準看。

極端地講,若一件作品,唯一可以欣賞的角度,就是先要理解一大堆行內、圍內的想法,然後在這個體系中用某種角度看,方會覺得有趣,而其他所有人只看到一件垃圾,那多半就只是一件垃圾而已。或者換個角度,如果有其他不依存在此等體系、用不同方法看都很有趣的作品,又為何要冒險花費如此代價(時間、精神等)進入那體系,去確認那件是否垃圾?倒不如去欣賞其他作品,然後假設那件看來是垃圾的東西是垃圾更合理吧。

最有趣的東西,應該是不用依存甚麼體系,又或者無論用何等角度去看,都會覺得有趣的,例如:自然、宇宙。這當然又是另一極端。

創作,應該都在這兩個極端之間吧。

(又,外文、古文,應該都可以算一個體系。翻譯,就正正是將入門代價降低的工作,方便更多人可以淺嘗。)

==

簡單評分:
A(☆☆☆☆☆)

【偷懶唔諗寫咩系列】本週電影隨口噏兩則:《黑天后(Vox Lux)》、《太陽的女兒(Les filles du soleil)[Girls of the Sun]》

《黑天后(Vox Lux)》

開頭本來覺得不錯,由開場到鎗擊,到救護車,沿途的構圖,旁白,出工作人員表,感覺都似好玩。(即其「序幕」部份。部戲明確分成幾幕,用字幕卡分開,但卒之係無乜意義既。)其後由慢慢康復,到在教會唱歌獲轉播,到被發掘出道,到開始迷失,一整段都無新意,但仍然可以用氣氛搭救,仍然會期待之後是會埋得到條尾,轉去有新意的境地。(即「第一幕」。)

到「第二幕」,主角長成 Natalie Portman,原本的主角女孩就變成主角個女。到這一幕,卒之要見真章,部戲究竟是言之有物,還是只是用氣氛和風格撐場面,就在這一幕可見分曉。結果,只是陳腔濫調,新意洞見全無,雖然 Natalie Portman 的表現略有新鮮感,但於事無補。「終幕」只是勉強延續落去,無咩特別值得講。

部戲用校園鎗擊事件做開頭(主角係倖存者),到第二幕又用恐怖襲擊承接,但實際上主角仍然只是普通的「成名⇒迷失」套路;而對於現實世界、對於暴力事件的觀察,最後就只是得「現代人嘩眾取眾、膚淺無聊」這一句講到爛、講到臭,本身就空洞無物的廢話。

其實說現代人空洞無聊,倒不如說是現代經濟和科技進步,勞動不再佔據那麼多時間,才能夠將原本真實的一面解放出來。能夠空洞無聊,或者能夠發現原來人是空洞無聊,本身就是進步的證明,又或者本身就是進步了。部戲的觀察去到「空洞無聊」就停了,那當然就只得空洞無聊了。

==

簡單評分:

C(☆☆☆)

###

《太陽的女兒(Les filles du soleil)[Girls of the Sun]》

找到篇近一年前的英文影評,其實無乜詳細直接講部戲,更多是批評部份因立場而盲讚的影評,兩樣我都頗讚同,就繼續懶下,adopt咗就算,無乜補充。

文中一點我尤其認同,部戲開場不久,開始入正題時,本來以為部戲會更著重講庫德人,他們的處境或與周邊政權的抗爭等等,也以為可以多講反抗軍,但結果全部都無,只是簡化成ISIL屠殺男人,搶走男孩,強暴和販賣女性,然後主角求存、復仇(?)和尋親。選了複雜的材料,但最終只拍出了平板無味的作品。

==

簡單評分:
C++(☆☆☆★)
(雖然我入場主要只為咗睇 Golshifteh Farahani,有她出場已經有分加。)

《復仇者聯盟4:終局之戰(Avengers: Endgame)》

"Avengers Endgame" Film Poster
(from Wikipedia;Fair Use/Fair Dealing)

(令和元年第一篇文!)

無咩其他戲上又想講,咁避唔開都係佢喇,但劇透係非常討厭,而且會被追殺,所以要好小心講。篇文分三部份:第一,超簡短盤點一下有咩已經知道,肯定可以講既;第二,從結構、常理,可以推斷若干必然會發生的事,及若干可能會出現的發展(如果想完全一片空白咁入場,連哩部份都唔好睇喇);第三,咁上兩部份就可以界定有咩可以安全咁講,哩部份就可以喺不超逾界線的情況,約略講下覺得部戲點。

# # #

〈第一部份〉

之前廿幾部戲,全部就係帶到唻今次哩集《群星薈4》,哩集應該算係「第一個十年計劃」既收結,而「第二個十年計劃」,已知會有蜘蛛仔、會有黑衫國王、會有女機師,第三個最近先出場唔計啦,前兩個上次唔見咗,但肯定會有辦法出返唻,哩樣係明顯一早知道既。

預告片,又見到今集有咩出場人物,唔重複喇,都係大家都知道既。

# # #

〈第二部份〉

上回講到,手套佬集齊六粒龍珠(點解唔係七粒…),消滅咗宇宙一半生命(其實係好無聊既,轉個頭就生得返咁多出唻啦),一眾英雄主角係輸咗,咁今集一定要贏返,如果唔係唔使拍啦,問題只係點贏法,同埋有無/有咩代價,而所謂贏,當然唔止係指打贏,係要將宇宙回復原狀/將被消滅既生命復原,但之前廿幾部都無其他法寶,咁所以一定要去搵/搶龍珠喇。(對面都知你係想要龍珠架嘛,咁當然唔會咁易俾你拎到手啦。)

又,都話只可能係搵龍珠搞返掂件事,咁其實都唔止上面講話已經知道會有新戲、新劇上嗰啲角色,基本上所有用龍珠整唔見既人物,都會用龍珠叫返返唻。咁當然叫返返唻,又有無其他下場就唔一定喇,哩啲嘢講唔埋既。

拍咗十年,角色越唻越多,要一部戲拍晒其實好難,上次都提過死剩嗰啲主要就係「第一個十年計劃」既主角,佢地要負責埋尾。(調轉諗,邊啲唔係舊嗰批,但又可以留低,就一定另有用途喇。)但人物其實仍然好多,無可能全部人經常一齊行動,咁所以都可以預想,要同上一部一樣,分幾個舞台行事。

真人電影同漫畫唔同,漫畫可以不停reboot,又可以moving time frame咁樣改下設定,人物想用幾耐就幾耐;但真人始終會老,同埋都無乜可能咁長張約無限套咁拍,咁所以「第一個十年計劃」既角色,無可能全員留低,帶去「第二個十年計劃」。部份可以帶到去下一個十年,但唔會係全部。(當然,我係假設佢地唔會想中途換人接力咁拍,我記得有一個角色係換過人既,但嗰次似係意外,唔係計劃。)

要退場既角色,當然有好多唔同可能既,退隱又得,死又得,失蹤又得,昏迷又得,雪藏冷凍又可以(唔係CCTVB藝員嗰啲,係真係雪住個人嗰啲),或者唔係完全退晒,下個十年耐唔耐出唻做配角都得(甚至變身奸角都可以添啦)。詳情就唔可以講,唔可以講有幾多,係邊個,下場係點,但入場前必然係預計到,一定會有哩啲事發生,爭在係邊一樣架啫。

又,雖然話哩套係「第一個十年計劃」既結束,但其實「第二個十年計劃」都已經開始緊(起碼已經有啲新角色起跑咗),咁哩套除咗收頭十年個尾,就又可以帶動下一個十年,不過究竟會唔會做,或者會做幾多,就好難估,可能會等下一部先真係著手搞都唔定。

同埋,高潮決鬥一定會有,但究竟係好似上一集咁大軍對陣,定係戰隊式咁幾個打一個奸角,或者兩溝,咁又自己入場睇啦。

# # #

〈第三部份〉

就咁,有咗上兩部份做基礎,就可以完全唔劇透咁講套戲喇。

搵龍珠既過程,概念係唔錯既,唔算好驚喜,但安排得唔錯,都適合啲角色,同埋編成一隊既角色都有火花。拍得出幾個舞台的特點,而且連結返「第一個十年計劃」同各個角色既背景,編排得唔錯。

尤其鐵男同盾男,佢地兩個已經有多次衝突同矛盾,今次都解決得唔錯,同埋各自連結返去自己既背景;但同樣係佢兩個,好多位都太白太明顯,其實就過火咗少少。鎚男頭兩部獨立的戲都唔得,第三集都唔太啱我口味,但自從嗰套就好似開咗個制咁,今集既安排同樣係有啲估佢唔到,實在係最驚喜最有趣既。粟米仔(綠巨人呀)都係,安排係有啲驚喜同有新鮮感。

同埋,上次就輸咗啦,咁輸咗之後點面對,有咩變化,有咩成長,其實全部人都寫幾好。由被擊敗之後的消沉,到再起,同埋若干running gag,氣氛都拍得唔錯。要退場既角色,以戲裡面唻講我覺得舖得太顯露,但除咗哩樣缺點,其實以成個「十年計劃」唻講,都各自有體面同合適既結尾,都算係咁。

真正唔滿意既,其實係有三樣。

第一,哩部戲本身,節奏有啲問題。上一集未完既事,今集了結得太草草。雖然係要留時間舖今集既發展,但我覺得可以處理得好少少。同埋幾個舞台,有啲係拍得幾好,但有啲又係收得好隨意,整體係有啲鬆散。

第二,高潮決鬥部份係拍得亂同唔好睇,好多角色做啲嘢都好無謂,純粹係為咗俾個機會佢出下場,做少少嘢咁。

第三,哩樣係最嚴重。我一直都講,Marvel Cinematic Universe,每部獨立既戲雖然都係各自既一部作品,但真正的作品係成個宇宙,哩樣先最好睇,「第一個十年計劃」最成功就係哩一點。問題係:「第二個十年計劃」幾個主角,得巫醫有啲特色同棱角,黑衫國王同女機師都非常無味無癮。(蜘蛛仔有潛力,但我覺得要睇多套先;蟻男兩套戲都唔得,但個角色本身唔錯,奈何能力上唔似擔得起成個十年計劃。)

今集哩三巨頭出場,係完全無進步,睇完係對佢地更加無信心。「第一個十年計劃」,四巨頭各具特色魅力,所以可以撐足十年,仍然有故事可以講,唔會悶。哩幾個新巨頭,我暫時係完全睇唔出點樣可以玩多十年。

==

簡單評分:

B+++++++++(☆☆☆☆★)