「揀十部電影」遊戲

會長和舅父先後tag我玩哩個「揀十部電影」遊戲,苦惱咗一排終於揀咗十部。不過規矩我唔打算跟,唔再tag人,而且懶得分好多日,決定一次過貼晒,又一定會講係咩戲(唔洗估),口痕可能講兩句。(其實唔講邊好玩,貼完大家又回應又講,卒之咪又係要講。)

(1)『がんばっていきまっしょい』

『がんばっていきまっしょい』

其實無半點運動細胞,從來不喜歡參與團體活動,但偏偏喜歡這片種。王道到極點的故事和元素,熱血之餘,拍出青春的青澀味道,但最精彩是拍得清爽不俗氣。(當然是有因為田中麗奈而偏心既。)Soundtrack CD長期在身邊,經常翻聽。

(2)When Harry Met Sally

When Harry Met Sally

細個當然只係想睇Meg Ryan,但慢慢更喜歡睇Billy Crystal;細個當然又唔係好睇得明,明白啲對白應該都好多年後。不過無論如何,總之都係其中一套令我覺得:「係咪大個咗就係咁?」既戲。

又,或者可以honourable mention,細個睇《風塵三俠》都曾經以為,係咪大個咗就會幾條麻甩佬一齊租屋住,生活係咪就係咁樣。後來當然發覺都唔係啦,但總之嗰陣有咁諗過。

(3)『Love Letter』

Love Letter』(ラヴレター)

哩套我覺得完全唔需要再講啲咩啦。

(4)《英雄本色》

《英雄本色》

根本係一套時裝武俠片,但當然最初睇只係覺得:「點解可以咁型!?」山頂這一幕,以前中學時幾個同學都識得背,而家再睇更加感概。又或者,而家好多人心裡面都收埋一個Mark哥。

(5)『GHOST IN THE SHELL / 攻殻機動隊』

『GHOST IN THE SHELL / 攻殻機動隊』

印象最深刻的畫面一定係戲中的香港風未來都市,但係哩部作品講意識、講靈魂、講生命、講咩先叫做「人」,睇完再睇仍然覺得好玩。

(6)『実録・連合赤軍 あさま山荘への道程』

『実録・連合赤軍 あさま山荘への道程』

其實只是在電影節看過一次,未必講得上好喜歡,但拍出赤軍後期的內部氣氛有多恐怖,超過三小時慢慢看他們如何變化和墮落,多年後回想仍然覺得好震撼。要揀十部戲的時候,多次刪走但又加返,或者都係值得上榜。

(7)『NANA』

『NANA』

我或者可以講一大堆理由,因為宮崎あおい好可愛(下刪二萬次)、因為中島美嘉太入型入格、因為其他選角全部都無得頂(例如松田龍平),等等各樣。但其實我都唔知點解,總之好鍾意,鍾意到入戲院睇咗七次。(後來係因為無乜戲院上,好難再入場睇,又好似覺得睇到「七次」就好適合部戲,所以先算數。)

由電影返轉頭去睇原著漫畫,都好喜歡。(電影續集就算啦。)

(又,所以喺哩喥都要擺佢係第七套。)

(8)《牯嶺街少年殺人事件》

《牯嶺街少年殺人事件》

唔知要由邊處講起,又或者只係因為當下所見的維多利亞城,同戲中六十年代的台灣慢慢重疊。張國柱在這一幕的眼神,或者比張震手中沾血的利刃更深刻。

(9)『海よりもまだ深く』

『海よりもまだ深く』

中年人之選。

(10)『踊る大捜査線』

『踊る大捜査線』

完全就係貪心之選,根本唔止一部電影,係一套劇集,好多套電視SP,幾部電影版,甚至有spin-off。總之就是過癮,原來刑警戲係可以咁樣玩,雖然後尾的電影版跌watt,但整體成個系列我仍然覺得過癮好玩。

〈後記〉

原來揀十部真係好難。如果再少啲,只係揀幾部,可以狠心啲,稍有猶疑就飛走,反而容易。除咗幾部鐵膽應該一定入選,其他大部份都非常難以抉擇。