由 samhau 發表的所有文章

【偷懶唔諗寫咩系列】近兩週電影隨口噏四則:《耶穌真係落咗嚟(僕はイエス様が嫌い)》、《信用欺詐師JP:香港浪漫篇(コンフィデンスマンJP -ロマンス編-)》、《從前,有個荷里活(Once Upon a Time in Hollywood)》、《海獸之子(海獣の子供)》

最近,似乎只有寫時局才對味道,但想到的幾件事都不太適宜寫,況且連續不停講也太多太煩了,還是努力想一下其他事情,稍為分一分心也好。

###

《耶穌真係落咗嚟(僕はイエス様が嫌い)》

電影節無看,廣獲好評,卒之有得上正場,改了一個非常貼地、非常貼近時事的戲名。(剛剛先話唔講香港時事…)好評滿街,但其實有點過譽,普普通通吧,普通到不太想花精神去想。真正有趣的只是「小小小耶穌」的表現方式而已,算是有點新意,但不值得如此吹捧。

==

簡單評分:

C+++/B- -(☆☆★)
(或許是有點偏見,我不否認,以信仰,尤其一神教信仰為主題的作品,通常都不喜歡。)

###

《信用欺詐師JP:香港浪漫篇(コンフィデンスマンJP -ロマンス編-)》

擺明是落力玩、落力娛樂觀眾的劇集電影版。由你預料會有的劇情和場面,到無預料過的客串嘉賓,總之不會令人失望,歡樂好玩。夠好玩,部戲已經功德圓滿,完全無可挑剔。由劇集開始已經是如此風格,電影繼續走同一條路,但有幾件事倒是特別精彩,值得一提。

長澤まさみ 由一則香港示威新聞(唔小心又講咗…)得到靈感,所以今集舞台就搬到香港玩。當然會大玩香港元素,海鮮舫、點心、廣東話、廟街、黑社會、雙鎗對峙、天台、舊樓等等各樣,甚至連《重慶大廈》林青霞的金髮女郎造型都玩了(還是我想太多?),最後又用劇情來補救製作的小缺憾(詳情不便講),實在機靈得很。

劇情套路是很明顯的,尤其有看過電視劇版則更易估到,因為類似的玩法都有玩過了。但重點,其實一直都只是看他們玩,尤其幾個主角扮鬼扮馬,玩不同的角色和風格,趣味就在於此。不過電影始終不及劇集,劇集一集一單元,可以變多款角色玩法,電影就比較少變化,但也都花過心思的了,幾幕偽愛情片都拍出惡搞質感。

新入團的 織田梨沙 幾可愛,客串的 桜井ユキ 都喜歡看。不過電影版最可愛 MVP 必然是由頭玩到尾,氣氛隨時話變就變的 竹内結子 💘。嗯,雖然 前田敦子 都不錯,但客串就不計了吧;不過緊記一定要留到最尾,片尾超超超超超精彩。(雖然我覺得不用提都估到會有吧,怎麼會不再玩一下?)

劇集電影版常見的問題是,與電視版連結太深,結果只是在大銀幕上播的 TV Special,無看過劇集版很難投入。不過這部本來就是單元性質,有先天優勢,就算完全不理劇集版,都是一部輕鬆好玩的老千片;而有追開劇集,裡面客串的角色就是 bonus。(另外仲有一個大 bonus,但這個忍口不講了。)

==

簡單評分:

A(☆☆☆☆☆)
(記住,只是入去睇人玩下,笑下,無謂咁認真,就OK。)

###

《從前,有個荷里活(Once Upon a Time in Hollywood)》

用大錢堆砌出過去的黃金時代,再由大量明星在鏡頭前 cosplay。拍得頗為細心精緻,節奏還可(除了開頭,尤其開車片段,太慢及有點無謂),都算好玩,但總之欠一點神采。

整部戲都似戲中做下把位的偽李小龍一樣,只得些許形相,無神。Be water, my friend. 唔係你識起飛腳就要起飛腳,無厘頭起飛腳只是拍戲做樣,表演唻啫;無啦啦、無目的、無時機,盲目起飛腳只係送頭,同戲中結果一樣。完全唔似提出截拳道的龍哥。攻應該有目的有理由,手段應該有效率。噢… 我頭先明明講咗唔講既… 無嘢,立即停口。

==

簡單評分:

B- -(☆☆☆★)

###

《海獸之子(海獣の子供)》

幾年前見過原著漫畫,看到封面本來有點興趣,但不知為何最終無看,現時看電影版補數。當年看到封面受其畫風吸引,變成動畫都仍能保留。此獨特畫風用來講宇宙、講生命,及另一條線講人生和相處和成長和青春,都很對味。唯一稍感失望,是高潮時有一部份的感覺太 CG(其實不知是 CG 還是手畫,但有種 windows screen saver 的既視感),不太配合,有點突兀。

其餘,有些地方拍得有點混亂,或許可以大膽再刪一些枝節,一部戲不用講其實太多,想兼顧太多,反令人看得不明所以。講宇宙講生命的部份,雖然不盡同意,但想表現的事都尚算有趣,除了上述的小瑕疵,大致上都能配合,用鯨魚的歌去貫穿也不錯。

結尾或許令人感到不解,其實我覺得還好,本來就不是要有答案的,只是要傳達一點感覺而已。

(終於有一套我可以完全避過不提時事!)

==

簡單評分:

B(☆☆☆☆)

警黑本是一家,不用分那麼細

警黑一家

由經濟學講起。

雖然只是個成績中下的經濟人,但畢竟當初就是受其世界觀所吸引才入讀,所以看事情都不免由這角度出發。尤記得上「產權經濟學」一科,市場交易需要有產權制度/合約安排,一般是雙方都同意的安排,但有一種安排是不用雙方同意的:暴力。當任何一方用「暴力」進行交易,你只有投降或奉陪,但結果都是由力量比拼去決定,不用事先同意制度和合約的安排,力強者勝。

(Joe Chan 指示我們看的 reading 好似是 Umbeck 寫加州淘金,我後來手痕上網買了本二手書。簡單講,因為無產權安排會令租消散,大家都無著數,所以其實慢慢就會生出一套制度,wild wild west 其實並非想像中的一片混亂。好似係。有中過張五常毒其實都知道都係嗰啲嘢,發開口夢都識得講。扯遠咗。不過若有興趣,網上有學報文章版。)

這個觀察對日常生活有何啟發呢?日常的交易,有人毁約就出律師信、上法庭、打官司,但最終法庭有了判決,又是如何執行呢?法庭難道有甚麼魔法,會令對方乖乖遵守?對方不理會法庭命令,你要強制執行,可以找執達吏;如果對方不理會執達吏呢?可以找警察。(大概係咁。)是,最終令對方遵守(或強迫對方遵守)合約(或判令)的方法,同樣就是:暴力,制度化、有制約的暴力。你唔肯,用力量強迫到你要照做。

所有制度,如果推到最底層,其實都是以暴力支撐,是用暴力去執行的。一個地方的政權,就是壟斷暴力的團體。(所謂「合法暴力」,因為該地的法律就是由其暴力所支撐。)換句話說,就是某地方最大的暴力團、最大的黑幫,警察就是其武裝暴力部門。用處就是用暴力確保其地盤內的人遵守同一套制度,令交易得以進行。這應該是政權、政府最基本的功用。

(為行文方便,本文就不去分「暴力」和「武力」了。)

為甚麼「黑幫」這種團體,基本上在各地都是不合法的?(日本的暴力團是特例,不討論。)政府的回答應該是:「哩喥我地頭,個場我睇架!」黑幫當然不會容許另一黑幫搶自己地盤的,為了保持壟斷,競爭者當然要打擊。

但為何黑幫又不會被完全消滅呢?

黑幫本身有自然的存在意義。社會上除了枱面上、可以見光、「合法」的活動和交易,總會有另一些枱底、不能見光、「非法」的活動和交易。一如上述,如果沒有產權和制度安排,就會有租值消散,大家無著數,所以地下世界都需要有制度、需要有秩序,維持這個功能的就是黑幫了。黑幫收保護費、抽水,性質等同稅金、差餉、交易徵費。

有合法,就有非法。法的限制越嚴,非法的範圍越大,黑幫的生存空間就越大。(是有大量實例的,最著名的莫過於美國禁酒時期。)試想像一下,如果黃、賭、毒全部合法,自然會有大量正當商人追逐利潤加入經營,合法的生意可以有地面上的制度保障,自然就不需要地下的保障了。

黑幫和政權(警察),本質上就是一樣的。

暴力團的本質是一樣,但一門生意是合法還是非法,競爭的條件可是大不一樣。當黃賭毒等生意是非法,經營者自然要擅長非法勾當所需的技能,包括使用暴力、組織/控制暴力份子的能力、收集執法情報的能力;但如果是正當生意,則更需要的是營商頭腦。在不同的制度安排下,競爭條件不一樣,自然有不同的勝利者。

黑幫收容的,主要就是競爭條件不適宜做正當生意/工作的人。(或謂,比較優勢是在於使用暴力的人。)如果無黑幫收容,或者就只能做體力勞動的工作。警察當然都一樣。或者頭目層級的人會有點不同的能力,但團體中大部份成員都是前述那一種人。可以講,黑幫份子和警員是同出一源,只不過加入了不同的字頭。(所以大家都拜關二哥實在合情合理。)

如上文所述,黑幫既為法所不容(因為其行為等同爭奪當地最大黑幫的地盤),但同時其生存空間正正是因為「非法」才得以存在。警察根本就不是與黑幫完全對立的敵人,更可謂是黑幫的衣食父母。

另一方面,黑幫本身就無可能完全消滅(有非法活動、有地下利益就自然會滋生,而有法就有非法。),其存在又能為政權暴力團刷存在感,在治下有一堆雜碎黑幫,既動不了政權,但又可以經常「提醒」市民他們需要警察(最大黑幫)的保護,當然就不會認真全力撲殺。持續存在的黑幫,持續存在的有組織地下生意,倒過來成為合法暴力超額擴張的藉口。

黑幫和警察,根本互利共生,你中有我,我中有你。

當然,黑幫管地盤都可以有高下之分,除了有錢有力,行事較有法度,處理糾紛時公道,理所當然會比較少難以收搭的麻煩,長治久安,發大財,就更有力招兵買馬,都是一個正向循環;否則,其實不過是暴力團,當然可以由其他暴力團取而代之,也不是甚麼稀奇事。噢,打錯了,其實想講政權,但想來道理都是差不多的。

純粹建基於暴力,權力由上而下的統治,無制約,腐敗是必然的。(絕對權力如何導致腐敗,可謂不證自明,不浪費時間了。)在黑幫地頭,若不甘屈從又無力反抗,就只能避走。(跟港共呼籲人唔順超就移民是同出一轍。)若實在被迫到走投無路,人數又夠多,最終就是起事——以暴力將區內黑幫打走,取而代之。但若然前述的權力來源不變,就只是換了一個字頭。

幾千年政權興亡,不過就是一部黑幫字頭更替史。

(又,之所以向外侵城略地會受到歌頌,其實就跟黑幫搶到新地盤一樣,當然是要大肆褒揚,以後才會繼續有人落力「幫阿公做嘢」。而到自己地盤被人搶去,當然就是敵方字頭橫行霸道、作惡多端,自己字頭受盡委屈了。基本上就是黑幫惡霸邏輯。此等歪理,在現代都仍然見得到,新搶回來的地盤、搶回來的土,厚顏無恥地聲稱是自古以來的地盤。)

上文主要的理論基礎是:人總是會追求利益的,所以制度的選擇都是朝向更大利益的方向走。上述的「黑吃黑」模式,或許比完全混亂好一點,但其缺點都很明顯。壟斷權力的一方必然會慢慢腐敗,最終要靠新興勢力以暴力搶走其地盤,取代其位置。掌權的一方腐敗已經夠無效率,更替時又要損耗,更無效率。甚麼制度會更有效率呢?

愚以為,這一點正是現代文明社會和之前幾千年的根本差異。抗爭一方,和港共/中共/大中華及其支持者,差異也就在此,後者不論其生活衣著等等各樣如何,在思想上根本就不是現代文明人。

幾千年來的政權,歸根結底就是:政權方壟斷了暴力,拳頭比較大,所以有統治其他人的正當性(你不認同就打到你要認同);但又因為壟斷了暴力/權力,不免會有上述弊病。如果聚焦在權力根基的底層,權力就是來自暴力,前述的制度是打破不了的。但人類其中一樣絕妙的能力,就是會講故事。如果暫時忘卻前述的一切,在概念上將這制度反轉來講,就可以有一套不同的制度。

在這個故事中,人本身就是自由、有權自治,但為了效率(以增加利益),不用每次都跟對手討論大家同意的制度,就倒不如大家都同意受一套制度約束,將自己本身就有的治權分出來讓給制度,再由各人出錢聘請人去管理那制度,制度亦壟斷合法暴力。不再是政權有力所以有權管治,而是人自願分一點權力出來以建立制度。

在這個故事中,個人才是老闆,是權力的來源,管治者不過是僱員(合法暴力團當然都只是僱員),當然要受老闆監察,表現不好就要換人。手握權力的人(尤其壟斷暴力的部門),便需要自我制約,恰當地運用權力,更好更完善當然是有公開的監察和制衡機制,以防腐敗、以防濫權。

權力者(尤其暴力團)失去絕對的權力,但同樣可以收保護費(稅金),而且免去倒台時要承受新字頭暴力對待的下場,有得有失。但更重要,是整套制度可以免去許多損耗,社會整體其實更有益處。

究竟是因為利益去相信這個故事,還是真心相信這個故事的前設(人本自由,主權在民)在道德上、道理上是正確的,其實無關宏旨。重點是,如果所有人表面上都信這個故事、信這個故事撐起來的制度,這套制度就可以運行。就是平常講民主法治那一套制度。是,其實很兒嬉,整套制度就只是靠個「信」字去維繫。

尤其,手握權力、壟斷暴力的人,其實是可以隨時撕毀這套制度的。濫用權力暴力,用種種手段逃避監察,對制衡的機制視如無物,此等事廿多年來越來越多見,最近個多月益發猖狂。因為他們壟斷了制度內的合法暴力,如果他們堅決濫權,在制度內根本就無從制裁。一旦執掌權力暴力,要墮落成專制極權其實只在一念之間。

替暴政搖旗吶喊的人可能還自以為聰明,以為自己才看透權力的本質就是暴力,拳頭就是道理,有軍隊就有統治權。本質上,或許真的如此,沒錯。(所以警察一墮落成黑警,警黑合作根本就不稀奇,本來就是同門的。)但上面那一套故事,就算是自欺欺人也好,卻是維持和平所必須。一旦拋開了這一套故事、這一層包裝,所有人民和政權的紛爭就不能再用現代文明的制度處理,因為政權就只等同黑幫,故事不免要回到「黑吃黑」的劇本。

一切麻煩,其實都是暴政自招的。

《反斗奇兵 4(Toy Story 4)》

並非《反斗奇兵》系列fans,先前三集的事情只依稀記得一點。包括:Jessie 好可愛;鄧梓峰最初深信自己真是巴斯光年;Jessie 好可愛;色魔胡廸被捉走(好似係咁上下);Jessie 好可愛;冒牌星戰老豆都一樣以為自己是戲中角色,追殺鄧梓峰(似乎同一間廠的出品都一樣蠢鈍);Jessie 好可愛;第三集的熊仔奸角頗有驚喜;Jessie 好可愛

奸角(不太奸)、冒險、救同伴、新同伴傻更更唔知定,雖然不記得細節,但從上一段所記得的片段,總之都似是舊招翻新再包裝。畢竟是超過廿年的長壽系列,過往行得通的招數,幾年前再玩都仍然發覺有效,當然不會輕易放棄,況且角色、背景和目標觀眾群依舊,穩打穩紮都是合理的;但在舊招數以外,今集的角色發展倒是有點新意。

(以下會爆劇情。)

牧羊女的角色變化,完全迎合近年的趨勢,雖然不算真正的新意,但在系列中仍算的新的,而且情節和人物都完整合理,效果不錯,非常討好。(雖然,仍然是 Jessie 比較可愛。)由出場、到帶隊闖入險地、計劃營救、與新角色交涉,一派慣於行走江湖的俠女風範,確是耳目一新。

幾個新角色亦不錯。John Wick 聲演傻更更特技人,夠呆,幾好。不過最過癮是兩隻毛公仔,夠瘋狂,節奏很好。(造形完全是攤位遊戲的 cheap cheap 大獎公仔,入形入格,但真係夠好笑,未來可以客串其他短片之類,應該有排玩。紅咗,公仔應該超好賺:就係要夠 cheap cheap、用料要最平、手工差差地先夠味道,但係可以照賣好貴。)Gabby Gabby 反而太正統,跳過唔講喇。

而 Woody 由牧羊女點醒,卒之跨出重要一步,不再以「返到主人身邊」作結,雖然在片中是意料之內,但角色有如此大的方向變化,也算有點驚喜,角色有實質成長。(不止是細路長大唔再玩玩具,而是 Woody 本身都能成長、都能放手了。)又,讓長壽角色拍檔分道揚鑣,實在很夠膽。

中規中矩,有少少新意,算不錯。唯一不滿是 Jessie 出場太少,明明好可愛。

==

簡單評分:
B(☆☆☆☆)

隨想數則

(其實無動力寫,但講好停刊三至四週,再停會懶,總之想到幾件事,立立雜雜,電影也有,其他也有,隨便寫一啲。)

# # #

旅行返到唻其實看了《蜘蛛仔》,又看了《上流寄生族》。

前者驚喜,既扣緊系列內在發展,又實在反映時代,從這角度而言可稱精彩。由美國(或環球)角度看,似映射 fake news 和各地冒起的 populist。而在香港,則又暗合社會現實,城中已無英雄,少年人唯有挺身而出。(而其實,世上若無事,本來只想追女仔談戀愛,也就是一般正常生活。英雄往往都是形勢逼出來的。)

不過類似觀點已有人寫過,例如哩篇——方俊傑:〈零劇透《蜘蛛俠:決戰千里》:是時代選擇他們 〉。(佢好似之後又喺蘋果再翻兜類似觀點。)再加一篇就太無謂了,浪費時間。

《上流寄生族》不錯,尤其畫面意象甚佳,不過太左不太對口味,而且同類訊息/故事,個人偏好較淡的表現,但本片拍「荒謬」確然不錯,中段那一扭頗有趣,但後半的發展則一扭完已經很明顯,倒不覺得有何驚喜。

# # #

旅行時看了《ホットギミック ガールミーツボーイ》,其實就只是想看 堀未央奈,表現有驚喜。不過,部戲本身就不敢恭維,只顧玩鏡頭和風格,由人物到情節和對白都頗無厘頭和惡頂,原著就算有更多細節和舖排,應該都不會好太多;但同場的當地女子,散場時卻在密密討論,似乎非常有共鳴,這或許真的文化差異,太難理解了。

又,看完想起早幾年有套《溺水小刀(溺れるナイフ)》,同樣莫名其妙、一塌糊塗。一查,唉,原來同一個導演兼編劇,早知一早查定,起碼有心理準備。(雖然想看 hori 應該都會入場。)不過拍攝地點倒是選得好,那個住宅區很有趣。(難得在當地看,當然有買特刊,書中連取景地都有介紹。)

# # #

紅底親中人謂衝入立法的人「暴力」、是「暴徒」,看來是口頭愛國,太少讀漢籍。

齊宣王問曰:「湯放桀,武王伐紂,有諸?」
孟子對曰:「於傳有之。」
曰:「臣弒其君,可乎?」
曰:「賊仁者謂之『賊』,賊義者謂之『殘』,殘賊之人謂之『一夫』。聞誅一夫紂,未聞弒君也。」
(《孟子.梁惠王下》)

(其實都九萬幾人拎過哩一段唻講,唔係我點會知呢,又無睇開哩啲書,雖然有一本喺書架。)

對抗不仁不義的政權,商湯周武易姓革命,不算「弒」,而是「誅」。

同理,只聞一群智慧仁勇的義士起義,未聞有暴力

何謂暴呢?

「秦取天下,非行義也,暴也。」(《戰國策.燕策二》)
(其實是在「漢語多功能字庫」查的。)

不義的暴政就是「暴」。

貪污、身有屎,怕被調查,衝上廉署打人就是「暴」。

四處放炸彈殺傷無辜,放火燒電台主持就是「暴」。

# # #

昔,某惡霸借錢唔還,只一味聲稱有拖無欠,債主多次上門追數不果,更被其爪牙打傷。卒之到有義士相助,惡霸先話:「咁我寫張期票畀過你啦。」債主當然信佢唔過,只肯收現金,而且不但要連本帶利收返,仲要追埋湯藥費、交通費。

細節省略,角色不同,但最近成件事的道理大概就係咁。拖咗咁耐,惡霸明顯信唔過,無實質即時效果,一切皆不可信。追咗咁耐先口頭應兩句(而且口惠而不實),都未計返一路以來的新仇舊恨,當然不能收貨。

# # #

法案本身係無得「壽終正寢」既(反而如果有咩法案通過咗,而又有「日落條款」,條法例就真係可以「壽終正寢」喇。),法案只可以「撤回或押後處理」(《議事規則》寫得好清楚),或者繼續二讀、三讀(或者中間再插個專責委員會?),或者拖到任期屆滿仍未完成就失效,係無得就咁話「死」既。

雖則「撤回」後都可以重提(行政當局可信度大概係… 零分至負分),但起碼「撤回」係實際存在的程序,「壽終正寢」就只係無聊廢話。又,明明係未出到世,應該係「胎死腹中」先啱。最終敲定用哩個詞嗰個,一係就中文極差,一係一味死要面,或兩者皆是。

# # #

特赦,本身就是制度的一部份,是一般制度失效,令刑事處罰變得不公義時的補救方法。恰當運用此制度權力,是完全無損法治的。制度失效,可以是冤案,不赦免反為不公。另外,管治失敗,官逼民反,事後追究當然亦屬不公,也適宜特赦。又,律政官員亦可基於公眾利益,決定不作檢控。

繼續追捕、迫害義人,顯見港共殖民政權不過一時權宜退半步,其與民為敵的邪惡本質完全無變。

Not yet. NOT YET.

The Hong Kong Police firing tear gas at peaceful protesters.
The Hong Kong Police firing tear gas at peaceful protesters.
(Photo: Sam Lee @ UnitedSocialPress 社媒; CC BY-NC-SA 3.0 HK)

Anyone with eyes on Hong Kong has seen enough of the brutality and evilness of the so-called police, and I need not share more of those here. But this, THIS, is really the quote of the day, or of the whole struggle.

“This is still Hong Kong, not China. Not yet. NOT YET."

It sums up everything we are fighting for.

We know we are caught by the unyielding pull of the giant black hole called China, and desperately fighting against it. Have we passed the point of no return? We hope not, not yet.

Perhaps, eventually, we could not escape. And at a certain point, outside observers would only see us at a standstill, our colours fading, turning red, but we inside would know better that we are torn into pieces, never the same. But we are betting on these two words: not yet.

This is all that the brave young men and women on the street are fighting for: not yet.

With all their blood and sweat and tears. Not yet.

NOT YET.

【偷懶唔諗寫咩系列】本週電影隨口噏三則:《追龍II:賊王》、《以恩寵之名(Grâce à Dieu)[By the Grace of God]》、《變種特攻:黑鳳凰(X-Men: Dark Phoenix)》

《追龍II:賊王》

鬼捂眼,我一路以為哩套係《火龍》續集,以為起碼有啲動作睇,所以先入場,但原來係《追龍》系列… 上次嗰部「宇宙最強 X 劉華」的超爛片,其史觀甚為特異可笑,故事又爛,若非鬼捂眼真係唔會入場。又,此爛片系列揀咗個名同倪匡名著《追龍》一樣,真係影衰晒。

今集王日日日繼續舐共,史觀當然同樣特異,但後來公安都無乜咁英明神武,反而成件事都係靠皇家香港警察出手(當年都仲未墮落成黑警),明顯未夠政治正確。但更加唔正確,係揀哩個風頭火勢唻上畫,擺明係為中國主子添煩添亂啦,起碼應該禁止佢拍戲五至十年。(拍少幾年爛片,都算造福人類,慳返啲資源。)

啫係,「反送中」除咗啲狗官大話連篇、囂張跋扈之外,主要問題係要保住「唔可以將人引渡返中國」哩一點。而哩樣之所以重要,就係因為北面嗰個不正常國家,佢想點砌你就點砌你啦,總之一切聽黨指揮。

咁套戲其中一點關鍵,就係話張子強(戲裡面當然係用假名啦,但大家都知拍緊邊個)喺香港就曾經脫過罪,之後又未拉到啦。咁其實任何正常制度,有時係會有啲漏網之魚,係唔出奇既,咁你今次有甩漏,制裁唔到佢,下次做好啲囉,無制度係完美無缺既,寧縱無枉,必然會有少少代價。

當然極權共產國家就唔洗玩哩套既,總之佢要你死,問題就只係點捉到你。一落到佢手,黨(同鎗)就係道理,要你死你就死梗啦。公開、公平審訊,人權,制度,喺深圳河以北的迷離境界都真係開玩笑。(臨尾幾隻字要用返匪腔普通話讀先有味道。)

套戲基本上就係原原本本就咁拍出唻,幾乎令人想讚下王日日日咁有膽色:古天樂最後的殺著,就係迫到張子強要著草返中國搏一搏,但係搏唔到啦,咁一拉到就要死喇。其實唔知仲算唔算洩漏國家機密,畢竟國家主席都話唔要司法獨立,但哩個時候拎唻拍戲就擺明別有用心啦。(又,咁佢有黨有鎗,自然可以亂講嘢,佢可以洩漏國家機密,你唔可以。)

==

簡單評分:

U(×)
(奉勸各位唔好入場。)

###

《以恩寵之名(Grâce à Dieu)[By the Grace of God]》

非常好,無論用任何角度睇,都非常有趣。由一個人物開始,慢慢揭開件事,又睇到周圍的人,再流暢地轉去另一個人物,一路擴展,然後又返轉頭。每一個人物都很好,而且有整件事的氣氛、情緒、狀況。雖然,戲中唔少人對信仰的糾結,其實我完全不理解也無感覺,但完全無損欣賞部戲。

人、信仰等等都已多人講,不如講抗爭。

抗爭,其實是由三個主角中最溫和、最虔誠的教徒開始。溫和傳統的和理非,當然是由寫投訴信開始,開始能面對自己受的傷害,嘗試在教內抗爭,但明顯一直俾人耍。而且你幾溫和都好,總係有啲鄉愿反而埋怨你搞事。到諗住追究,自己件事已過時效,搵到一個又唔肯企出唻,卒之都係用返寫信作結,寫信報案,照搵公權介入,搞大件事。

到轉去第二個無神論者,最初都覺得算啦,但後來發現搞細路神父仲有接觸細路,就開始激啲喇,都係佢去搵傳媒插手,同開始搞組織。溫溫吞吞唔得,都係要有多啲行動。之後都一路係組織裡面激啲嗰個,但其實更有趣係喺戲中提出最激的手段,組織裡面所有其他人都反對,佢本來都仲想去,但後來律師話有風險,唔值得搞,就無搞喇。

中途又有第三個主角,早兩個都係生活穩定的中產,哩個係邊緣人,將自己人生所有不如意都歸咎於細個俾神父搞。到後段,其實令人懷疑,佢究竟係想抗爭以達成目的,定係抗爭已經變成目的、抗爭已經係佢人生唯一有啲意義既事。(要講套戲有少少瑕疵,就係最尾無處理到哩點,臨尾好似變返主流一般人,避開咗個問題。)不過,又無壞事,佢諗乜,有咩所謂呢?目標一致其實都夠喇。

(其實仲有一個,都算主要,但又著墨不太多,算半個啦。)

後來有階段性成果,激既想再去盡啲,溫和保守的想見好就收,有人只想退落唻回復普通生活。就算完全不理本片的主題,這抗爭群像都好好睇。

==

簡單評分:
A++(☆☆☆☆☆)

###

《變種特攻:黑鳳凰(X-Men: Dark Phoenix)》

睇完上集《《變種特攻:天啟滅世戰(X-Men: Apocalypse)》已經知,20th Century Fox 已經搞唔掂哩個系列,心急求成,以為搞得大就會好,完全忽略咗要慢慢舖的過程。今集完全有齊哩啲弊病,角色行動一時一樣,無啦啦加外星力量又好奇怪,成部戲幾近一無是處。現時,只期待經廸士尼收購後,此系列回歸 Marvel 宇宙,可以重新唻過。

其實交叉人系列,最好睇是用超級英雄故事包裝社會議題,故事內就圍繞異能人同一般人類之間的關係,影射的就是種族議題。漫畫似乎比較豐富,但美漫分鏡太亂睇唔慣,電影就一路都集中講光頭教授同磁力人的路線之爭,一邊係和理非左膠大愛,一邊係我族優先的勇武抗爭,咁當然多數時間都係王道主流會佔上風,但偏鋒其實亦不算真正反派,只是手段不同的反英雄而已。

而今集,多少露出一啲陰暗面的光頭教授,其實亦承認(但我印象中佢立場一直如此),和理非並非目的,只是要有辦法同人類共存,咁哩個形象其實係用唻保護多數異能人。另一方面,連磁力人都已經放低咗,同一班手下隱居一隅,總之你唔搞我我唔搞你咁就算喇。一下子,成個系列既核心衝突就無咗。

變咗今集要面對既,係由上面落唻,入侵正常世界的外星妖邪。咁你心靈感應又好控制又好大愛乜叉都好啦,當然係無意義既,外星妖邪一心要消滅你,講道理又有咩用呢;但另一方面,勇武亦唔見得有效果,因為對手比你更孔武有力。中間無謂細節跳過,到臨近最後決戰喇。雙方合作,都唔係無用既,尤其勇武抵抗係收拾到對方一啲嘍囉,但外星勢力頭目一出手,立即就收皮。

到哩邊最強的磁力人出手,始終係主角之一,都頂到一陣既,總算都拖到些少時間,但一樣係贏唔到。人力有時而盡,唔係話你努力啲就補得到個差距,但或者佢都心知肚明,不過點都要盡下力,又其實或者,意義就係拖多嗰一陣。拖一陣,好似無乜特別,但係都可以好有用。奮勇抵抗(幸好唔洗犧牲),就算打唔低敵人,都總算悲壯。所以磁力人都係主角。(而且型過光頭教授。)

卒之,咁戲就一定會贏得返,但都唔係完全無厘頭。外星武力太強大,無得打架喇;你無得打,咁搵多個外星武力同佢打囉。目的係要贏,係要砌低敵人,手段唔緊要,唔係自己手贏返唻都唔緊要。光頭教授卒之拉攏返有外星力量附身的珍灰,用更強大的外星力量,輾壓妖物,一揮手就令嘍囉灰飛煙滅,外星妖婦喺絕對武力面前亦無力抵抗。

贏得到的手段,就是好手段,有比敵人強大的人做盟友,盟友出手幫你打贏,都係贏。異能有好多種,力量都有好多種,打得贏係高強,叫得到人幫你打贏一樣都咁有用。咁所以光頭教授都仲係主角。一如大雄好廢,但大雄有叮噹,所以大雄係主角。小智都跟啱大佬,有比卡超照住,所以咁多輯都仲做緊主角,仲成日換女伴添。

兩個角色、兩條路線的故事,應該仲有得講落去,只不過換咗公司,遲幾年應該會換人再重新唻過。

==

簡單評分:
C-(☆☆★)
(難得有 Jessica Chastain 加盟,但個角色好廢,可惜。希望遲下會有其他角色搵佢。)

【偷懶唔諗寫咩系列】本週電影隨口噏兩則:《哥斯拉II:王者巨獸(Godzilla: King of the Monsters)》、《無主之作(Werk ohne Autor)[Never Look Away]》

《哥斯拉II:王者巨獸(Godzilla: King of the Monsters)》

去爛蕃茄看評分,這又是是一部影評人狂踩,但觀眾頗感滿意的戲。其實許多動作片、特技片都有類似情況,但今回我覺得影評一方錯得尤其離譜。綜觀多數劣評,都是以「一般電影」的角度去踩,由故事到角色關係/情感,各樣都有人提,其實也非無道理,劇情普通(偏爛)、若干人物是一噼屎、等等… 所以部戲算幾好,睇得過癮,但不算精彩。

《真.哥斯拉(シン・ゴジラ)》就是精彩。)

但若謂其劣,則肯定是評鑑準則出了問題。怪獸片,主角是怪獸,重點是怪獸出場是否過癮,打鬥是否刺激有趣。故事當然不能無,但普通老土也可過骨,水準以上的全部都算bonus。(基本上連貫,有頭有尾,並非完全跳脫,已經算合格。)同理,人類其實是閒角,不能說完全可有可無,因為全然失蹤則無以推進,人類無危險亦比較難講故事,但基本上是從旁輔助的角色,故事有推進就可以了,本身就不應該預期會有深度,若有的話是bonus。(若干人物意圖不明、古古怪怪,通常都可以算數不理,只要大部份角色普通正常已經足夠。)

一次過出了大量怪獸,有幾隻主力參與打鬥;哥斯拉和三頭龍都頗有威勢,造型不錯;四巨頭有幾場激烈打鬥,各有招數特色,連莫斯拉都有埋身肉搏的表現機會。入場就是為了看怪獸,部戲可說是交足貨。特意安排 章子怡 的角色為孖女,其實都隱然延續了莫斯拉配小美人的公式,算交足功課啦。

又,東寶三大怪獸+基多拉,根本應該算陣容鼎盛吧。雖然,根本只是聽過名,對拉頓無甚印象。主要只看過九十年代那幾套哥斯拉,莫斯拉因為有小美人所以印象較深,另外只記得機械哥斯拉和機械三頭龍,拉頓… 睇資料應該其中一套有出,但無論如何都記唔起…

==

簡單評分:

B(☆☆☆☆)

###

《無主之作(Werk ohne Autor)[Never Look Away]》

又是本地影評讚到不想入場看,但本週少戲上,卒之看了。普通吧,過譽。上文提開,也不妨提一下,這部在爛蕃茄的評分其實也只是普通正面。近年發覺,這類西洋當代史片種,華文影評往往吹捧得過份,通常都不大可信,倒是去爛蕃茄看綜合洋文評價比較中肯。

童年的部份其實拍得最好,由主角的阿姨撐起整個段落。到東德時期,已經開始拖,其經歷及其人也拍不出甚麼味道。到西德時期,簡直進入睇錶等散場的狀態,尤其尋找其藝術創作路向的部份,無聊得很。倒是,貫穿整部戲的納粹醫生/主角外父,只看到關鍵的時刻和片段,但感覺深刻得多。

總的而言,部戲所有配角都比主角好,但偏偏浪費太多時間在主角身上。

==

簡單評分:
B(☆☆☆☆)

【偷懶唔諗寫咩系列】本週電影隨口噏四則:《阿拉丁(Aladdin)》、《友誼永錮(Greta)》、《去吧!女神兵團(ระวัง..สิ้นสุดทางเพื่อน)[Friend Zone]》、《不老的戰跡(They Shall Not Grow Old)》

《阿拉丁(Aladdin)》

噢,其實無睇過 Robin Williams 配燈神的原裝版卡通電影,只零星睇過後來的電視版卡通系列,一路都以為《阿拉丁》的賣點是 Jasmine 好可愛、Jasmine 好可愛同 Jasmine 好可愛。(阿拉丁就擺明係閒角啦,邊有人理佢架。)

無比較之下,Will Smith 睇落都可以啦,不算非~常精彩,但實在不錯,而且佢似乎玩得最開心過癮。阿拉丁一如所料成個閒角咁啦,由角色到演員(和造型)都不甚討好。本來是有些少擔心 Jasmine,因為海報上的硬照實在唔多掂… 但當 Naomi Scott 在銀幕上郁動起來,原來又好可愛喎,著起那套經典的綠色衫都很吸引,令人眼前一亮。

結果,賣點果然是 Jasmine 好可愛,咁都可以收貨啦。

==

簡單評分:

B(☆☆☆☆)
(不過不失、普普通通的廸士尼片咁囉,舒服、特技漂亮、有唱歌[雖然我唔鍾意聽]、有跳舞,安全穩陣,你預咗入場睇咩就係有咩,無驚喜無失望。唯一值得提的只有 Naomi Scott 而已,選角真的不錯。)

###

《友誼永錮(Greta)》

部戲本身無咩好講,非常悶,完全無拍出來的價值,簡直浪費資源。老土,公式,由畫面到演出幾近無一可取處。臨尾營救脫險,本身已經好老土同明顯,刻意唔影樣更加低能之至。(而套戲唯一可取處,就係嗰一段 Maika Monroe 幾型。係咁多,無喇。)

故事由執到手袋,自己親身拎去還俾人,又俾人氹入屋飲咖啡同傾計,然後又越來越親近開始,然後慢慢變得可怕。大概有九萬套驚慄片都係咁樣發展,本身不值一提;反而係:點解有咁多套作品都係用類似大橋先最令人不解。

喺地鐵見到有人漏低嘢,唔洗理佢,等佢自己走返轉頭執又好,去到尾站等職員執起又好,總之會有應該負責的人理啦,你理佢做乜呢?就算你手多執起咗,拎去站務處又好,拎去警署又好,總之都係有應該負責的人會理會啦,你咁多事做乜呢?路不拾遺,唔止係你唔好貪人啲嘢,係根本就唔好搞啲嘢啦,要搞要負責既人會搞返啦,你搞佢做乜啫?

到自己親身去拎到人地門口——其實去到哩一步,無論主角遇到任何麻煩及凶險,俾人捉又好、劈開十九碌又好、塞入石油桶沉落東京灣都好,我都已經覺得完全唔抵可憐,基本上係自己攞唻,抵死——但其實,去到哩一步係未完全陷入危險既,你要自己拎返個袋俾人,咁你咪拎返同俾返囉,放低就走啦嘛,做乜又要入屋呢?更加抵死。

然後,哩啲角色永遠都會好投入同陌生人傾偈。又係,咩怪人、鬼怪都好,係你自己惹返唻,抵死既。做咩同人傾偈呢?唔鬼理就無事啦。之後仲主動保持聯絡,加倍抵死。

無數咁多部戲都係咁,但其實見到唔知咩嘢唔關你事既,見到啲唔關事既陌生人,唔理,件事已經完咗,成套戲唔洗拍。點解可以拍咁多套戲都係咁,咁多個角色都係咁中伏,更加無厘頭係——點解咁多個編劇都會覺得哩啲自己拿屎上身的主角會有觀眾可以代入及/或同情呢?完全不能理解。(有人肯出錢拍固然又係奇怪。)

==

簡單評分:

D-(☆★)

###

《去吧!女神兵團(ระวัง..สิ้นสุดทางเพื่อน)[Friend Zone]》

典型俊男美女愛情片。(分類唻既,不代表對主角容貌的主觀評價。)仲周遊東南亞,又去泰國當地不同景點,拍到旅遊特輯咁,真係好典型。總之就情節老土,主要都係賣下靚人靚衫靚景,仲會特登寫啲情節賣下肉添(都係賣樣既一部份啦其實)。咁老土得唻,都砌得流暢,輕輕鬆鬆,無乜過錯。

可能收得,近幾年多咗好多泰國片上,不過入去捧場其實係因為有一大段喺香港取景。果然,喺外人眼中,香港就係霓紅燈招牌、飲茶同成龍。

==

簡單評分:

C+/B-(☆☆☆★)

###

《不老的戰跡(They Shall Not Grow Old)》

以一戰當年拍低的片段,配上老兵口述的經歷,剪輯、修復、上色而成,由前線士兵的角度看,頗有趣,選輯得好。不過純粹當看故事,中後段開始感覺重複,但或者前線膠著的戰事就是如此重複吧。又,科技進步令戰爭的形式大變,如此形態的戰事或許真的只有一戰留下來的片段了,這可能是最值得睇的理由。

至於反戰、戰爭殘酷之類,其實要知道戰爭殘酷,不用睇片段,用膝頭哥諗下都知啦,從來不覺得睇唔睇哩啲影象會有咩分別。再者,除非人類滅亡,否則一定會繼續有戰爭,一部、兩部或更多部戲,都不能改變此現實。睇,也只是純粹對歷史、軍事等等感興趣而已。

==

簡單評分:

A-/B++(☆☆☆☆★)

【偷懶唔諗寫咩系列】近兩週電影隨口噏五則:《Pokémon 神探 Pikachu(Pokémon Detective Pikachu)》、《圓美大盜(The Hustle)》、《殺神 John Wick 3(John Wick: Chapter 3 – Parabellum)》、《人心狗吠(Dogman)》、《極北(Arctic)》

《Pokémon 神探 Pikachu(Pokémon Detective Pikachu)》

主要就是入場看如何用 CG 將 Pokémon 現實化,其次就是看 Ryan Reynolds 配音了。不過,始終是兒童向作品,配音的對白也不能太過份(任天堂也不容許你亂玩比卡超吧,畢竟是連同人作品都管得極嚴的知名惡霸),雖然仍然有麻甩味道,但有些少到喉唔到肺。

後者算合格吧,不算太滿足,但也不算失望。前者,非常滿足,簡直可以做標準教材。將原本是二次元的幻想生物化成三次元,那就忠實地去想像,原本的樣子、原本的比例、原本的感覺,放到三次元應該會如何,這就對了。其實是很簡單直接的一件事,不要手多就可以了,但「不要手多」原來是非常難做到的。(看近來出事的超音鼠就知道了。)

看到比卡超、傻鴨、噴火龍、金魚王、超夢夢等 Pokémon 變得如此實在,在銀幕上跑跳、與真人互動,但又有原本遊戲/卡通內的感覺,部戲已經有八十分打底,其他一齊都只是 bonus。(尤其,比卡超的毛皮畫得甚佳,質感真實,又保留可愛感覺。這種毛茸茸的表面,其實很容易出事,稍一不慎可以變得很詭異。例子:近來隻超音鼠咪係囉。)

臨尾的大陰謀部份,彷如重現 1989年 Tim Burton 版《蝙蝠人》中小丑的毒氣球,更感過癮。

==

簡單評分:

A(☆☆☆☆☆)

###

《圓美大盜(The Hustle)》

一街都讚的好戲無謂加把口,一街都彈的爛片都無謂踩多腳,只需要確認:果然好爛下,詳情可免。

咁其實一心入場只是為了看 Anne Hathaway,對部戲本身都無期望,咁又無欺場,大部份篇幅都有出場,而且 Anne Hathaway 依舊好可愛,近年又少見佢落力做無謂笑片,總之入場睇佢就當收貨啦。(雖然其他人都好惡哽。)

==

簡單評分:

D(☆★)

###

《殺神 John Wick 3(John Wick: Chapter 3 – Parabellum)》

兩個字講完:爽,型。

系列作很多時越拍越差,《John Wick》是少數越拍越好的,這部更遠勝前兩集。例如同樣賣爽、賣型的《Underworld》系列,開頭是好型,但後來越拍越爛。本來有啲擔心今集加 Halle Berry 的角色會累事,但她似乎回勇型返次。

前兩集其中一個問題是:講到 John Wick 好勁,但實際拍出來是笨手笨腳,完全唔夠爽手,似是靠條血bar夠長多過靠身手好。今集雖然都有靠HP多捱贏的問題,但整體打鬥比前兩集爽快俐落好多,一洗頹風。製作班底明顯自覺前兩集有此問題,今集甚至有角色吐糟謂 John Wick 點解咁慢手腳,是否因為退隱五年鈍咗?

此等惡搞成份,今集頗多。例如不停玩成個 John Wick 系列就係:「刺客 John Wick 俾人殺咗隻狗所以重出江湖大開殺戒掀起一場腥風血雨」哩一點,由對白以至情節都玩到盡。又搵 Keanu Reeves 講返《Matrix》經典對白:「Guns. Lots of Guns.」(打鬥高潮尤如《死亡遊戲》溝《龍爭虎鬥》,又唔算惡搞,但同樣係擺明玩。)

除了幽默,引到你笑,更重要是見得到作者好明白套戲賣緊乜嘢、要做乜嘢:爽,好玩,過癮,型,好型。情節、故事?理鬼佢。連戲中人物都一樣,無乜所謂,總之夠型夠好玩就可以。

所以逃走要去古董舖,無厘頭要砌把鎗,要用古典冷兵器對打,在紐約街頭要騎馬追逐廝殺,俄國黑幫要無厘頭在劇場總部排芭蕾舞,要打到去 Casablanca,搵人要去沙漠(好似拍礦泉水廣告定煙仔廣告咁),要切手指(Yakuza?),仲出埋忍者同奇門兵器。總之:現代感 + 異國風情 + 古典風美術,唔知點解,不過通常哩幾樣溝埋就型,咁所以套戲就照溝,同型咗。(其實幾集以唻都係咁,但今集玩得更大規模。)

咁拍咗三集,跟住仲明顯會繼續拍落去,究竟係講乜?刺客 John Wick 俾人殺咗隻狗所以重出江湖大開殺戒掀起一場腥風血雨吖嘛。無聊?係。理得佢啦。總之佢夠型,我睇得開心,食爆谷食得爽,乜都夠啦。

==

簡單評分:

A++(☆☆☆☆☆)
(其實更簡單講,成個系列都係中二病,不過係拍得好型的中二病。)

###

《人心狗吠(Dogman)》

有時,有些戲就是這樣:你明知是拍得好,客觀而言是好,但總是不喜歡。我不喜歡這部戲,但確實部戲是好的。(但因為不喜歡,所以又說不出謂部戲「好看」。)

尤其主角的角色,心腸似乎不錯,但又有壞習慣和貪心的一面,生活既有表面的部份,又有犯罪的部份,在惡霸面前,有時又靠其帶挈,但更多是受欺凌無法反抗,中後段陷入兩難的困境,到爆發。各個小節都拍得很好,那社區內的配角亦不錯,整個環境的氣氛都營造得很好。到最後收結,將屍體搬來搬去那一大段,很好。

客觀而言,我知道那一段是很有衝擊力的,將部戲各種複雜的情感,都濃縮到那一段,舖得很好,本身那個場景設計也好。但也只是客觀而言覺得應該如此而已,其實看的時候是無甚感覺的,根本我一直都不明白我為何要看這主角或這一堆人或這個處境,整部戲從來無投入過,所以感覺也不強烈。但我覺得九成是我問題而已,部戲本身是好的。

==

簡單評分:

B++(☆☆☆☆★)

###

《極北(Arctic)》

絕地求生片,多少都有點相似,今次特別在主角原本已在遇難地安頓好,可以長期留守等候,但忽然又有人遇難闖入此生活,才有後來的脫險旅程。旅程拍得尚可,但有趣處其實是由一人獨處,到有人相伴(雖然大部份時間根本完全無反應…),雖然都是意料中又熟口面,但效果倒是不錯。

可以一看。

==

簡單評分:

B(☆☆☆☆)