HKIFF #40

第四十屆 ‪#‎hkiff‬ 時間表已排好+買完飛。算順暢,但手續費幾近四嚿水,貴得令人氣忿。今屆睇48場47套,皆因 ‪#‎NMB48‬ 部紀錄片做膽,兩場都去。係,雖然鍾意睇戲,但我首先是個偶像宅。 https://goo.gl/6VAbtl

電影節假2016,Day I:今年卒之又放足電影節假,今晚開鑼去大會堂睇4K數碼修復Mark哥;「要爭返口氣……唔見咗嘅嘢,要自己攞返」,簡直係同今日嘅香港人講。 #hkiff

電影節假2016,Day II:又去原荒,每次都深覺交通不便;諗起交通,今年仲又諗起地底嗰壇嘢,又掠咗香港人百幾億;其食相之難睇,其實是否表現其時日之無多,要快手割禾青?雖云放假專心睇戲,但卒之日日都唔知喺喥諗乜。 #hkiff

電影節假2016,Day III:今日繼續要去那城中荒島,主要係為咗去睇套《選老坐》。(啫係被迫改過個偽名叫《選老頂》嗰套,真係聽到人「頂」一聲,香港啲電檢、審查越唻越過份,此等惡法真係要早啲消滅。) #hkiff40

電影節假2016,Day IV:今日,早上要去睇《蝙蝠人大戰外星肌肉男》;電影節期間,往往是點搵時間睇正場戲最難搞。 #hkiff40

電影節假2016,Day V:今日重點本來是「澤東座談會」,但結果感覺最期待是早上去睇《新米萌兔巡查》,嘻。 #hkiff40

電影節假2016,Day VI:全日在文化中心,唔洗轉場,重點係睇《Goodfellas》。 #hkiff40

電影節假2016,Day VII:今日要轉兩次場,有啲擔心由原荒出科學館嗰一轉趕唔趕得切。 #hkiff40

電影節假2016,Day VIII:今日有宮藤官九郎。 #hkiff40

電影節假2016,Day IX:終於第到開始「8米厘狂熱 日本獨立崩世代」環節,今日重點是塚本晉也在《鐵男》前的作品。 #hkiff40

電影節假2016,Day IX:下畫喺office附近睇戲,中間有幾個鐘空檔時間,特登走返上去… 拎隻杯落樓下買咖啡hea一陣可以平三蚊。 XDD #hkiff40

「TOO YOUNG TO DIE!」宮藤官九郎が香港映画祭へ、「僕はまだ青春が続行してる」 https://t.co/Z3ypXXCYXc //莫名奇妙咁喺宮藤官九郎現場大合照入咗鏡 XDD #hkiff40

電影節假2016,Day X:今日雖然有幾部戲看,但重點絕對是 #NMB48 ,都話偶像宅身份一定行先,其他戲忽然不太重要。 XDD #hkiff40 #山本彩 #矢倉楓子 #電影節公布出席演員係咁講 #可惜無 #みるきー

電影節假2016,Day XI:今日要去三個場,搭來搭去,地鐵最開心。 #hkiff40

電影節假2016,Day XII:愚人節,第一件事係玩自己,電影節之外,另外買咗場九點幾早場。 #hkiff40

電影節假2016,Day XIII:今日睇五場,早前有同事見到時間表時頗驚訝,但其實睇開電影節就覺得濕濕碎;睇返早幾年時間表,一日五、六場常有,試過七場添,不過今年好似無咗文化中心十點幾場次,就無哩支歌仔唱,連想癲下都無機會。(除非去戲院睇場早場先,我有時會。) #hkiff40

電影節假2016,Day XIV:上次俾電影節過期資料昆咗,應該今日先係有 #山本彩 同 #矢倉楓子 ,總之今日重點又係 #nmb48 啦。 #hkiff40 (又要講,可惜無 #みるきー … 尤其係而家成個勢準備畢業咁…)

電影節假2016,Day XV:話咁快又到閉幕日,今年放假期間返過office,喺電梯撞到同事,佢頗驚訝,皆因以為我放長假係去游埠,其實都啱既,我去咗光影中旅行,今晚凌晨返香港,聽朝返工,不過無手信。 #hkiff40

=====

短評(如有):

《英雄本色》:三十週年,4K修復,彷似香港寓言--
做了三十年宋子豪,「有爭取過機會咩?無,無呀!」
忍了三年,Mark哥怒吼要「爭返口氣」,「唔見咗嘅嘢我就自己攞返!」
都三十年了,可惜仲有人未認得出阿成係忘恩負義的奸角。 #超短影評 #hkiff

《與蓓蒂的21夜(21 nuits avec Pattie)[21 Nights with Pattie]》:色、食,人之大欲;死、生,人之大事;氣氛和鏡頭感覺熟口熟面,但人物、對白寫得輕鬆有趣,也可以。 #HKIFF40

《原味成人童話(Tale of Tales)》:除了「失望」,別無更貼切形容;三個故事本身拍來已經無味,勉強三線跳來跳去更是無聊,簡單拍成三段短片或許更佳。 #HKIFF40

《魚男突變(돌연변이)[Collective Invention]》:雖然側擊韓國社會問題的娛樂電影不少,但這魚頭男本身頗有趣,可惜拖得有點長,後勁不繼,結尾… 見仁見智,我倒是嫌太樂觀正面,但鹹魚青菜各有所好,也不能算特別出事。 #HKIFF40

《兇手還未睡》:無咩好講… 其實只是想睇上一套,但已太夜無場轉,所以順手睇埋,咁無期望就… 你以為!其實都可以出乎意料咁… 唉… 故事同劇本已經出事,頗為粗劣;不停的畫外讀白更是難頂之至;撐港產片係好,但可否揀下先播… #HKIFF40

《深海光年(El botón de nácar)[The Pearl Button]》:由宇宙,到星體,水,海岸,智利地理,原住民,智利歷史… 畫面好,某些章節、訪問有趣,但我中途就走失了--那一條「線」太薄弱,連繫牽強,沉溺於詩意玄談,有點散。 #HKIFF40

《安藤忠雄:武士建築師(Tadao Ando – Samurai Architect)》:NHK年來拍過他多部紀錄片,這一部新作得益於片庫舊作,串連他多年來的作品(包括無動工或不能完工的半成品),頗能看出其一貫的想法和執念;拍來樸拙有力,頗有NHK味。 #HKIFF40

《選老坐》(偽名:《選老頂》):以江湖片計,不算最好,但仍好睇,都收貨;但入得場都知,重點係明射、明喻、明寸港中政治,係由頭玩到尾;賣埠,可能都得既,但肯定過唔到深圳河,真係拍俾香港人睇;入場,主要其實係撐場;好睇,頂多只係bonus。 #HKIFF40

《搵家寶(Comoara)[The Treasure]》:不少對話都提到當地歷史,若然熟悉羅馬尼亞當會另有趣味,但可惜我是歐洲盲,實在對牛彈琴;但只當一部幽默小品,人物樸實,對白頗佳,亦是清新可喜。 #HKIFF40

《齊齊整整我們仨(Nous trois ou rien)[All Three of Us]》:佳作,希望上正場;尤其頭半截講伊朗,由專制鐵腕但世俗開明社會,推翻帝制後換來更可怕的宗教獨裁,拍得越是幽默輕鬆,越是使人慨嘆;人物亦甚精彩,不容錯過。 #HKIFF40

《大地飛灰(La tierra y la sombra)[Land and Shade]》:熟口熟面,類似主題看過九萬幾次;大部份戲圍繞小屋附近,場景和燈光尤如舞台,簡潔小巧;不過小屋周圍燒蔗田一幕,實在如畫一般,看那一幕就覺得值了。 #HKIFF40

《戰地情書(Cartas da Guerra)[Letters from War]》:今年第一套睇到斷片,書信文字漂亮但似睇翻譯朗誦MV,思想和感情亦很普通;當然也可能只是我攰,而且此角度寫戰爭從來無感,每次都覺得:「睇歷史都知啦」、「咁又點?」,有人就有戰爭。 #HKIFF40

《紅的告別式(ピンクとグレー)》:係諗住係睇青春片,中途扭橋嗰下真係無預過咁玩,卒之都玩得幾好,效果唔錯既;故事就普通,後半係電影原創,似乎真係大刀闊斧咁改編,最終都係返一部正統青春片;事前無留意行定勲會親臨,忽然又諗起多年前同一場地聽他映後漫談。 #HKIFF40

《超科學怪雞(Mænd og Høns)[Men & Chicken]》:有趣,但部份running gag本身唔夠力,玩到悶;對白不錯,尤其哲學討論頗有啜核抵死處,刻薄嘲弄宗教甚得吾心;不過拖呀拖,到結尾其實無乜力,結局亦已知道太耐、太明顯,擺到過咗氣,悶咗。 #HKIFF40

《花與愛麗絲殺人事件(花とアリス殺人事件)》:舊作《花與愛麗絲》肯定有買碟看,但內容毫無印象,應該不是太喜歡;今作故事人物一貫岩井俊二風,表現平穩,好看;不滿的部份是作畫,背景用實景加工,靚,但太硬太靜;人物作畫差,風格亦不合;畫格之間筆觸不一,動作亦不順暢。 #HKIFF40

《蒸汽女孩與不死貓(Avril et le Monde truqué)[April and the Extraordinary World]》:Steampunk平行世界,設定本身不錯,作畫風格配合,機械設計亦很有趣。(不過一路睇,不停諗起娜汀亞,好分心。XD) #HKIFF40

《盜亦有道(Goodfellas)》:「What do you mean funny, funny how? How am I funny?」剩係哩一段,已經值得一睇再睇。 #HKIFF40

《黨同伐異(Intolerance)》:一世紀前的電影,成千上萬人寫過,自己搵啦;其製作規模實在瘋狂;四線各不相干的故事交織,就算今日也實在難見於主流,無怪乎當年票房仆直。 #HKIFF40

《我要做偶像(يا طير الطاير)[The Idol]》:成名路部份,查Mohammed Assaf睇真人都可以,拍得最出色倒是童年部份,其姊角色極搶鏡;流行文化未必有即時影響,但正是其通俗易懂最能凝聚人心,大概是如此故事;當然亦有寫加沙之苦難。 #HKIFF40

《神蹟美少女(La helada negra)[The Black Frost]》:氣氛很好,也喜歡其人物,但實在難以言喻,也似乎無太多好講的;但必然要提女主角Ailín Salas,其魅力就算不是一整部,也起碼是撐起了半部戲。 #HKIFF40

《墮落天使》:雖然感覺比前作《重慶森林》遜色,更支離破碎,也像炒冷飯,但其實彷如其平行時空,補上了這一片,九十年代的作品似乎會更完整。 #HKIFF40

《俄軍抗德記( Алекса́ндр Не́вский)[Alexander Nevsky]》:戰爭場面果真經典,條頓軍在地平線現身列陣一幕尤為震撼。 #HKIFF40

《我記得(Remember)》:題材本身我是毫無興趣的,但撇開此節不談,單單看成一部失憶老人復仇之旅,其實亦甚好,結尾尤為精彩。 #HKIFF40

《浮華塚(รักที่ขอนแก่น)[Cemetery of Splendour]》:若非我碰巧非常精神,早就斷片十幾次,無聊至極,簡直後悔入場,早知去食個飯,無閃走只因唔想行開時阻住現場仲睇緊/扮睇緊的觀眾。(雖然應該唔少瞓咗,我估。) #HKIFF40

《早死早投胎之地獄搖滾篇(TOO YOUNG TO DIE! 若くして死ぬ)》:地獄部份其實有時粗糙陽春,但又被其瘋狂惹笑蓋過;節奏有時頗怪,但又用劇中搖滾歌舞救返;簡直就是在CULT片和㞗片的邊界走鋼線,但最終其搞笑元素贏了,是好看的青春純愛片;森川葵很萌。 #HKIFF40

《1/880000的孤獨(1/880000の孤独)》:浪人生活,就是苦悶吧,沒有奇巧,就只是生活小品,也不錯。 #HKIFF40

《電柱小僧的冒險(電柱小僧の冒険)》:《鉄男》系列其實第一部最有趣,這部則更早一年,土炮特技,配上中學生科幻冒險純愛,節奏瘋狂,雖然劇情人物時有無厘頭,但就是有種粗野的趣味。 #HKIFF40

《非電影(Notfilm)》:向來喜歡看講電影的紀錄片,雖然講的題目那套戲興趣不大,但將其背景人物交織講故事倒是好看的,不過我主要其實是想看Buster Keaton而已;結尾嘗試將這故事的意義擴大,講電影/菲林/數碼,倒是有點無謂。 #HKIFF40

《怪物達人逐個捉(Creature Designers: The Frankenstein Complex)》:看幕後特技製作,大師巧手為怪獸注入生命,實在感到其純真童趣;實在觀眾也不是傻的,演員對著綠幕、綠公仔演戲,問題非視覺效果不真實,而是演出缺乏質感。 #HKIFF40

《幸福北韓(В лучах солнца)[Under the Sun]》:精彩萬分的計中計,北韓一心搞宣傳騙局,但俾人格食格玩返轉頭,其簡單手法不過是將假象背後的製作特輯一同播放,但其對比效果實在極佳,其荒誕處既可笑又可佈;結尾偷偷一小段訪問,更是震撼非常。 #HKIFF40

《NMB48女神之育成(道頓堀よ、泣かせてくれ! DOCUMENTARY of NMB48)》:聚焦於長年非選拔、受挫低潮、出頭無望而畢業等成員,以至粉絲行為,及組合在總選成績欠佳;不過借此探討偶像產業之社會現象及陰暗,相對無視其為何吸引的本質及成長過程。 #HKIFF40

《驚天動地搶新聞(Thank You for Bombing)》:其實,人就是嗜血,人就是醜惡,實在不用再多部戲來講:「係,咁又點?」;不過,其三段故事本身實在好看;首段尤為精彩,互相追逐拍得緊湊,對比電話另一端漠不關心;電話鈴聲到第三段來呼應,妙。 #HKIFF40

《21世紀淘金之城(Eldorado XXI)》:伏,正確唻講係前半伏,後半正正常常、普通;一開場,秘魯靚景,以為無死;跟住近一粒鐘,影住一段山路,礦工上上落落,配以密集嘈吵的訪問和電台錄音;無心機睇字幕,斷片無數次,開眼仍然係同一幕,依然嘈;到一粒鐘後先正常。 #HKIFF40

《話多多二人幫(はなされるGANG)》:故事和角色本身均具魅力,但邊拍邊打破fourth wall則更妙,究竟在講故事或在講「講故事」已經分不清楚,簡單有趣。 #HKIFF40

《勁凹3D(Love)》:爛極無聊,由故事到角色以至演出均空洞無味,唯二「可取」是有3D扑嘢,及一場3P拍出一點火花,其餘章節均老土沉悶,嘗試用刺激的味精音樂、音效和燈光掩飾,其實欲蓋彌彰,尤如以平價香水遮臭狐,中人欲嘔,導演不如改行拍甜片算啦,無謂浪費菲林。 #HKIFF40

《死亡遊戲》:雖然得嗰兩場係堅嘢,但時間咁啱又夾(因為想睇同一場地下一套),就入場去大銀幕睇下李小龍,如此而已;不過其餘部份,其實勉力用新劇本、舊片段,左砌右砌套戲出唻,雖然粗糙,但尚算係有心思,其實都有趣;補拍部份由洪金寶做武指,風格實在同李小龍太唔同,唔夾。 #HKIFF40

《我殺無悔(Já, Olga Hepnarová)[I, Olga Hepnarova]》:冷靜緩慢,有時零碎,「重演」真人真事,負面看是拍得木獨,正面看是有想像空間,但其實不論正反看都只是普通、溫吞;女主角Michalina Olszańska很萌(重點錯)。 #HKIFF40

《愛之街角2丁目3番地(愛の街角2丁目3番地)》:完全瘋狂兼嘈到爆廠,老實講我係頂唔順,追逐部份更搖到頭暈;感覺熟口熟面,拍到某青年睇醫生講名係園子溫,立即明晒,兩人係老友,當堂諗起「東京ガガガ」的路上瘋狂表演;雖然理解不能,但我諗其瘋狂處正是重點(啩)。 #HKIFF40

《翡翠之城》:除了拍緬甸玉石礦(其實有一部姊妹作更聚焦,但無看過),更重要是拍導演的大哥;鏡頭後的導演,向鏡頭前的大哥訪問,有時又變成兩人聊天,簡直有偷看家庭影片之感;另,有一幕,大哥忽然在礦場唸起范仲淹的詞,非常超現實。 #HKIFF40

《戰火浮城(Mariupolis)》:想法是好的,去拍戰火底下的居民生活,開頭幾幕亦著實不錯,但很快就甩轆,選材散亂,七零八落,就似是一堆隨意拼湊的片段,不一會就變得極為沉悶無聊。 #HKIFF40

《UNK》:漫畫之神的兒子,果然亦很厲害,一部短片用上各種鏡頭、節奏、音樂、色彩、特效,完全不依靠言語,但連接自然,隱約又能看出故事;本屆至今最驚艷作品,cinefan再播時不容錯過。 #HKIFF40

《鬼高校(HIGH-SCHOOL-TERROR)》:由小道具到節奏,完全是脫胎自漫畫短篇,特技化妝雖然粗劣,但拍出氣氛,比現今多數鬼片高明多了。 #HKIFF40

《雨女》:好了,又是時候承認我其實看得一頭霧水;不過,如果相信今次選影節目夠代表性(其實多半是,導演都是現時的名導),則結合早幾日看過的其他同期獨立日本電影,可見當時的作品都有這種躁動、破壞、廢墟氣息;連現時作品歡樂開朗的矢口史靖竟亦不例外。 #HKIFF40

《沉默的證人(The Witness)》:事件本身頗有意思,可自行查「Kitty Genovese」,本片抽絲剝繭的追查過程甚有趣,也實在不宜爆響口,由死者親弟調查,尤為本片最精彩之處;不過亦因此視點所限,關於新聞/真相/故事的部份就蜻蜓點水,也屬無可奈何。 #HKIFF40

《老笠》:黑色奇幻,本無問題,但對白人物就太生硬;臨尾扭橋,亦是太夾硬,如此一筆抹去先前種種無厘頭、不合理,真係出術兼縮骨,又懶又當觀眾傻;偶爾有一兩幕或一兩句好笑好玩,但不能靠這幾下撐起一部戲。 #HKIFF40

《陸拾陸(Sixty Six)》:剪貼手法係好玩既,但似乎僅此而已,新鮮感過後就越來越悶,似有故事但又不清不楚(講得如此混亂,寧願無故事好過),手法一再重複就開始斷片,現場亦越來越多人中途放棄… 我無走,只因為仲有下一場要睇。 #HKIFF40

《男之花道(男の花道)》:連矢口史靖都咁PUNK,園子温當然更甚,而且睇落熟口熟面… 片尾,謎底解開:早日睇平野勝之套《愛の街角2丁目3番地》有園子温參演,今日園子温哩部則有平野勝之當「撮影協力」,難怪畫面、場景、風格都有不少相似,根本係一伙。 #HKIFF40

《NMB48女神之育成(道頓堀よ、泣かせてくれ! DOCUMENTARY of NMB48)》:今日重點雖然係 #山本彩 同 #矢倉楓子 到場,但部戲本身再睇更似《鏗鏘集》,太著重偶像產業的社會角度,其實改拍其他團體都一樣,忽略了 #NMB48 本身獨特之處。 #HKIFF40

《登上須彌山(Meru)》:雖然只是看人登山,但此中卻有莫名魅力,本身無甚意義、目的之事,只因一心想做而歷盡千辛萬苦,這傻勁有時看來就是人之為人的特質;其實如何講這故事實在是末節,現場實地片段本身就夠吸引。 #HKIFF40

《耳語星球(ひそひそ星)》:漫畫短篇味極濃的故事,意涵並不新鮮,但緩慢沉靜的節奏卻拍出味道,用福島實景扮作人類文明黃昏境象亦甚出色;有趣處是園子温謂劇本乃廿五年前寫就,只是現時方有機會拍;但對比其早期作品之嘈雜誇張,難以想像他當時拍的話會變成怎樣,可惜問不到。 #HKIFF40

《新宿天鵝(新宿スワン)》:有漫畫原作,劇本亦有人寫好,演員亦有人揀埋,園子温真係負執拍而已(佢係咁講),咁確實又無乜園子温味,但可能本身故事也不差,佢講故事又無問題,總之都係好睇既商業片,其實都唔錯。 #HKIFF40

請勿淺踏草地。

%d 位部落客按了讚: