標籤彙整: 小泉今日子

【偷懶唔諗寫咩系列】本週電影隨口噏四則:《閨密食堂(食べる女)》、《沙贊!神力集結(Shazam!)》、《小飛象(Dumbo)》、《炸雞特攻隊(극한직업)[Extreme Job]》

《閨密食堂(食べる女)》

爛。

似乎是想拍食和色,但拍得一塌糊塗、肢離破碎。食的部份拍不出味道、拍不出質感、拍不出感動、拍不出滿足;色的部份則拍得更奇怪,有一幕是完全無厘頭兼突如其來的洩慾,有一幕的床上挑情說話是高檔私房菜菜單,令人無所適從,效果是惹人發笑。

撇開主題,更基本的事都同樣爛。例如,洋人女角去 小泉今日子 家寄居,有一幕初到時 小泉今日子 偷望她一眼,有一幕問庭院古井是否真的無水,有一幕摺衫,然後就跳到要離開時,竟然話多謝她照顧?就算當客套說話也罷,我是否看漏了半小時劇情?根本就無寫過兩人的關係吧!

另外,如 壇蜜 那條線、山田優 那條線、以至 前田敦子 那條線(甚或其他),根本就是湊數的吧!或許套戲本身太爛,大部份人都似無心機演,交行貨,總之簽了約,會在片場出現,劇本寫了的對白照讀,收了錢就算。小泉今日子 似乎是唯一一個,仍能看似自然自在的角色,實在厲害,或者應該讚她敬業。

(當然,如 壇蜜 的表現就同部戲爛無關,本身就不是能演的人,想轉型其實很難。她永遠慢兩拍、說話無起伏、無時無刻像神遊的慵懶氣,適合的角色根本也很有限,專心繼續做色氣的角色算吧… 有一幕,女兒伏在她心口,壇蜜 明顯擠不出眼淚,鏡頭唯有避開流淚的一刻,cut去滴到女兒面上的[假?]淚水,VO的感想是淚水味道「しょっぱい」,但畫面的焦點和重心卻明明是「おっぱい」… 連攝影都若有所指…)

整部戲,比較能看的部份就只得 沢尻エリカ 進食的樣子。導演及/或攝影似乎都知道,所以總是大頭近鏡拍,甚至戲中 小泉今日子 都目不轉睛地望。エリカ様 實在很可愛,看她進食應該是整部戲唯一有趣之處。(其實不如整部戲兩小時全部大頭近鏡拍她就好,由前菜食到甜品,肯定比現時的成品好看百倍。)

==

簡單評分:

E(☆)
(極爛,仲有星只因為演員我喜歡,而且有幾個鏡頭拍 エリカ様 食嘢。)

###

《沙贊!神力集結(Shazam!)》

今次這部,可說是「超水準」之作。

根據往績,DC 片九成都是爛片;「超水準」,換個說法就是「高於平均」,DC 的「高於平均」,大概就等同於一般電影的「微劣」至「普通或以上」。不過「高於」,其實又無講明幅度,這部都算「大幅高於平均」,是近年 DC 少有看得過去的作品。(當然,經歷過如此多套水準低劣的 DC 片,對此宇宙的作品要求已降得很低,所以又可能是預期低,才覺得特別好。)

簡單講,這部是廸士尼合家歡兒童冒險電影 crossover 超級英雄片。(但明明 Marvel 先係俾萬惡的米奇老鼠收購咗架喎!)基本上都是主角同屋企人關係唔好,忽然有神奇力量,之後有冒險情節,走上歪路,之後反省發現家庭好重要,大團圓結局。(其實仲有一樣元素,雖然條伏線完全唔伏,但姑且忍口唔提。)

雖然有點瑕疵,例如變身後性格似比變身前的細路更幼稚,但整體節奏都不錯,而且都好笑過癮。總之,隨隨便便入場輕鬆一下,都睇得過。

又,DC 片幕後主腦係咪有咩家庭創傷?套套都係講父母同家庭架喎。Marvel 唔係無,但起碼唔係每一套都完全圍繞同一個主題。正常人生活都唔會只係得一件事值得關心,點解成個 DC 宇宙所有英雄的故事都是一模一樣?蝙蝠人同外星肌肉男有「你老母時刻」,魚男又海底二萬里尋母,今次條沙參又去搵阿媽?我諗我知 DC 點解出事,係咪個創作班底太缺乏母愛?唔該換過批人,下次記住要揀啲成長時期家庭幸福美滿先好請。

==

簡單評分:

B- -(☆☆☆★)

###

《小飛象(Dumbo)》

其實舊版從來無睇過,無從比較,但單睇新版本身就… 好悶。

劣評都見唔少,本來想提的幾樣:夾硬插啲現代保護動物思想落部戲喥好無聊、故事堆砌等等,全部都見過人講,可以跳過,慳返啲口水。只另外簡短講兩件事。

其一,女主角(個細路女)超超超超超超超超超超超超超級煩,非常非常非常非常非常非常唔討好。其實主角咁討厭,套戲已經死得。馬戲團生意唔好越做越縮(其實幾近家庭式小生意,馬戲團唔掂,啫係成家人唔掂咁上下),到老豆打完仗卒之返到唻但無咗隻手,所有事都無關心過,只係顧自己、顧住個道德高地,乞人憎到極點。(聽落好熟口面,咪好似左膠呀、動保撚呀、環保撚呀之類咁囉。)

其二,生咗隻怪模怪樣既大耳象出唻,其實應該好易搞吖,求其吹係咩特別品種既象,仲易引人入場睇啦;嗰陣又有唔少freak show,就算自己諗唔掂,一定有人肯買,Danny DeVito 又為何會咁苦惱同不滿呢?完全同個角色都唔配合。(又,馬戲團長一角應該都係套戲裡面寫得比較好的角色。)

==

簡單評分:

D++++/C- -(☆☆)
(好在都有 Eva Green 睇下。)

###

《炸雞特攻隊(극한직업)[Extreme Job]》

有幾好睇,又有幾見到套戲脫胎自八九十年代黃金時期的港產片,全部有人講過,唔講喇。(連《當年情》都出埋做配樂,都唔洗講啦,爭在賣炸雞未有搵許冠英扮雞啫,但有一幕都有咁上下味道。)總之好睇,好笑,值得入場,講完。

另一樣,幾乎個個寫哩套戲都講,或者想諗:點解香港以前拍得出,而家又拍唔到哩啲戲,反而韓國仲參考咗港產片,拍返部新嘢、好嘢出唻呢?我無完整答案,諗唔到,但有兩樣嘢想寫。

其一,可能以前真係拍太多,到後期又濫拍,多爛片。或者係有陰影,或者係唔想重複以前做過既嘢(雖然聽落都唔似,香港人最鍾意翻炒翻到爛先停手;又或者,就係心理上覺得哩個類型玩爛咗,所以無人再掂),又或者係真係諗唔到點超越過去成功的作品(但其實啫係懶啦,真係無得突破咩?)。又或者都只係藉口,唔知,不過好似係有種「都拍到厭啦」咁既感覺。

其二,其實都係相關既。近年的港產片大多走向兩個極端(啲一味人多,但完全唔好笑既笑片唔計):無錢,小品既,全部都剩係拍啲社會派戲,其實唔少拍到說教多過似拍戲;錢多,大製作,全部都明星靚人靚衫靚景,連啲草根景都要拍到懶有格調咁,人物同情節又要賣弄有幾精巧、食腦(但通常都只會揭示編劇有幾低智)。

通常見到都係哩兩款,中間無乜其他嘢,消滅晒,唔知去咗邊。點解?睇返上文:唔知。不過點解香港拍唔出哩套《炸雞特攻隊》,反而韓國拍得成呢?上面兩樣可能係線索。都唔怕畫公仔畫出腸,其實嗰幾類戲,咪咁啱又似香港現時某幾類人?而通常可以攞到資源及/或可以出到聲,就係嗰幾類,咁咩人就拍咩戲囉。而點解係嗰幾類人走咗出唻,就係我解答唔到嗰部份。

==

簡單評分:

A(☆☆☆☆☆)

【偷懶唔諗寫咩系列】近兩週電影隨口噏七則:《給我一個道歉 (قضية رقم ٢٣)[The Insult]》、《來自星凶的愛(散歩する侵略者)》、《盜海豪情:8美千嬌(Ocean’s 8)》、《爸爸的便當(パパのお弁当は世界一)》、《虎膽追兇(Death Wish)》、《50次初吻(50回目のファースト・キス)》、《侏羅紀世界:迷失國度(Jurassic World: Fallen Kingdom)》

《給我一個道歉 (قضية رقم ٢٣)[The Insult]》

這或許是所有(或至少 99.9999%)法庭戲的通病,但本片實在尤其嚴重:電影中的法庭往往無甚程序可言,律師的陳詞東拉西扯、離題萬丈,講的事情都跟審理的事項無甚關係,又可隨便傳召、呈上任何證人/證物,基本上是為所欲為,法官幾乎都不會制止。

為了戲劇效果、製造衝突,少許扭曲或許難免(所以是通病),但本片的操作著數有點過份。法庭、官司這容器,其實承載不了太多內容。

除此以外,圍繞兩個男主角,講黎巴嫩的近代史、內戰傷痕等等,距離雖遠但都有趣。尤其 Yasser 一角,角色和演出都精彩,但這一角寫得太討好;相對的 Tony 則大部份時間充滿仇恨,雖然是用來舖陳其轉變,但兩造對簿公堂時,觀眾卻因此少了難以取捨立場的掙扎。

==

簡單評分:

B++(☆☆☆☆★)
(歷史、仇恨、民族和國家的瓜葛等等,籠統撮成幾句並不公道,倒不如不講,自己入場看,有興趣就再看相關資料。)

###

《來自星凶的愛(散歩する侵略者)》

沉悶、了無新意的科幻片,捱過兩小時,結論卻更無聊。主要是入場看 長澤まさみ 而已,但實在不值得。

==

簡單評分:

D+(☆☆)
(純粹是因為演員而加分,長澤まさみ 不錯,有 小泉今日子 和 前田敦子 客串又加分。)

###

《盜海豪情:8美千嬌(Ocean’s 8)》

非常非常非常難看。

八個主角完全無任何化學作用,1+1+1+1+1+1+1+1,結果是連「8」都無。八件殺戲兇手,不入戲、無貨交、零火花,無聊程度直逼黃氏出品港產賀歲爛片。不過這八人只是幕前刀手,幕後黑手罪責更大。整個盜寶過程亳不刺激,無任何深刻的危險,緊張程度低過坐merry-go-round。此系列向來精彩的籌備過程更兒嬉至極,隨便堆砌,所有對手均狀似低能。

臨尾交代她們狀似收山,手法極端老土,但希望是真的吧,不要再放這幾個角色出來虐待觀眾。

==

簡單評分:

E(☆)

###

《爸爸的便當(パパのお弁当は世界一)》

似是十分鐘的長廣告片,拖長成一部七十幾分鐘的戲。頭幾次開飯盒雖然是刻意重複搞gag,但手法有點呆板;又,整部戲的演員都頗生硬,最自然反而是賣菜的嬸嬸。其實就是只適宜在twitter上瘋傳一陣的小故事(原來就是這樣的真人真事),頂多可拍成一系列廣告(想來應該不錯,嗯,但又似乎已經有類似的廣告系列了。),拍成電影根本不大適合。

倒是這生硬的男主角,正職音樂人,又真的做過類似的事,結集成書,改編過漫畫和電視劇。今次扮另一個人,其實多少似做自己。這件事比部戲更有趣。

==

簡單評分:

C-(☆☆★)
(其實,不如將這故事構念[雖然是真事,並非創作]賣給食品相關公司,用來拍廣告系列吧。)

###

《虎膽追兇(Death Wish)》

舊版系列無睇過。

雖然評價不佳,但其實還好。雖然無或缺少(影評人期望的)反省、社會/公義等等… 但其實這本來就不必要有的呀!復仇片,其實主要就是拍復仇、拍出痛快/爽/出一口氣的感覺而已。Bruce Willis 的演出合格有餘了。而且對其角色一步步變化,其實算有頭有尾,動作處理得亦不錯。

若然無無謂的期待,其實不錯。(一部擺明要「爽」的片,批評其缺乏思考,實在無謂。)

==

簡單評分:

B+(☆☆☆☆)

###

《50次初吻(50回目のファースト・キス)》

十數年前的原裝西片版無看過。

想當年,山田孝之 和 長澤まさみ,分別是青春純愛片《在世界中心呼喚愛》電影版和電視版的男女主角。多年過去,山田孝之 在勇者系列明顯玩壞了,現時多數都是期待他惡搞;長澤まさみ 最近在電視劇《コンフィデンスマンJP》也都玩得很瘋;總之,兩人現時都不太適合愛情片形象,哈哈。

電影由 福田雄一 操刀,其實主要反而是賣 福田式 笑料,愛情線就隨隨便便吧。(反正現時見到 山田孝之 已經想笑。)但同樣屬「福田組」(又或者是「福田勇者組」)的 ムロツヨシ 和 佐藤二朗,則受限於材料,有點勉強。

總之,其實主要是入場笑。大概,中等(中等偏低)好笑。

==

簡單評分:

C- -(☆☆★)

###

《侏羅紀世界:迷失國度(Jurassic World: Fallen Kingdom)》

(其實上週「罷工」,這部應跳過不寫,但反正寫開,順便講兩句。)

侏羅紀系列已無新板斧了。

其實上回已經無甚新意,只是繼續有新恐龍:更快、更高智、更兇猛。(用戲中說法直譯:「更多牙、更多爪。」)除此之外,有何新意呢?奸角越來越樣版,行事手法亦如一,令人思疑不止恐龍是複製的,奸角恐怕亦如是。今集一樣,只是更差。到大屋時已經宛然direct-to-video格局,來黑市競投的眾人堆砌得惹人發笑。

以科技重現恐龍的哲學、道德討論,幾集已經講到爛;今集再出一個複製人,其實益見技窮。

到最後恐龍「回歸」自然,人類世界要與龍共存,看似將整個系列世界推得更闊,其實正好相反。當恐龍不再靠人類、靠科學重生,當恐龍重新遍佈世界,又跟其他電影世界的怪獸、猛獸又何分別?再發展下去,或許只會變成「鯊龍捲(Sharknado)系列」、「多頭鯊(n-Headed Shark)系列」之類的低成本爛片。

==

簡單評分:

C-(☆☆★)