標籤彙整: Brie Larson

《復仇者聯盟4:終局之戰(Avengers: Endgame)》

"Avengers Endgame" Film Poster
(from Wikipedia;Fair Use/Fair Dealing)

(令和元年第一篇文!)

無咩其他戲上又想講,咁避唔開都係佢喇,但劇透係非常討厭,而且會被追殺,所以要好小心講。篇文分三部份:第一,超簡短盤點一下有咩已經知道,肯定可以講既;第二,從結構、常理,可以推斷若干必然會發生的事,及若干可能會出現的發展(如果想完全一片空白咁入場,連哩部份都唔好睇喇);第三,咁上兩部份就可以界定有咩可以安全咁講,哩部份就可以喺不超逾界線的情況,約略講下覺得部戲點。

# # #

〈第一部份〉

之前廿幾部戲,全部就係帶到唻今次哩集《群星薈4》,哩集應該算係「第一個十年計劃」既收結,而「第二個十年計劃」,已知會有蜘蛛仔、會有黑衫國王、會有女機師,第三個最近先出場唔計啦,前兩個上次唔見咗,但肯定會有辦法出返唻,哩樣係明顯一早知道既。

預告片,又見到今集有咩出場人物,唔重複喇,都係大家都知道既。

# # #

〈第二部份〉

上回講到,手套佬集齊六粒龍珠(點解唔係七粒…),消滅咗宇宙一半生命(其實係好無聊既,轉個頭就生得返咁多出唻啦),一眾英雄主角係輸咗,咁今集一定要贏返,如果唔係唔使拍啦,問題只係點贏法,同埋有無/有咩代價,而所謂贏,當然唔止係指打贏,係要將宇宙回復原狀/將被消滅既生命復原,但之前廿幾部都無其他法寶,咁所以一定要去搵/搶龍珠喇。(對面都知你係想要龍珠架嘛,咁當然唔會咁易俾你拎到手啦。)

又,都話只可能係搵龍珠搞返掂件事,咁其實都唔止上面講話已經知道會有新戲、新劇上嗰啲角色,基本上所有用龍珠整唔見既人物,都會用龍珠叫返返唻。咁當然叫返返唻,又有無其他下場就唔一定喇,哩啲嘢講唔埋既。

拍咗十年,角色越唻越多,要一部戲拍晒其實好難,上次都提過死剩嗰啲主要就係「第一個十年計劃」既主角,佢地要負責埋尾。(調轉諗,邊啲唔係舊嗰批,但又可以留低,就一定另有用途喇。)但人物其實仍然好多,無可能全部人經常一齊行動,咁所以都可以預想,要同上一部一樣,分幾個舞台行事。

真人電影同漫畫唔同,漫畫可以不停reboot,又可以moving time frame咁樣改下設定,人物想用幾耐就幾耐;但真人始終會老,同埋都無乜可能咁長張約無限套咁拍,咁所以「第一個十年計劃」既角色,無可能全員留低,帶去「第二個十年計劃」。部份可以帶到去下一個十年,但唔會係全部。(當然,我係假設佢地唔會想中途換人接力咁拍,我記得有一個角色係換過人既,但嗰次似係意外,唔係計劃。)

要退場既角色,當然有好多唔同可能既,退隱又得,死又得,失蹤又得,昏迷又得,雪藏冷凍又可以(唔係CCTVB藝員嗰啲,係真係雪住個人嗰啲),或者唔係完全退晒,下個十年耐唔耐出唻做配角都得(甚至變身奸角都可以添啦)。詳情就唔可以講,唔可以講有幾多,係邊個,下場係點,但入場前必然係預計到,一定會有哩啲事發生,爭在係邊一樣架啫。

又,雖然話哩套係「第一個十年計劃」既結束,但其實「第二個十年計劃」都已經開始緊(起碼已經有啲新角色起跑咗),咁哩套除咗收頭十年個尾,就又可以帶動下一個十年,不過究竟會唔會做,或者會做幾多,就好難估,可能會等下一部先真係著手搞都唔定。

同埋,高潮決鬥一定會有,但究竟係好似上一集咁大軍對陣,定係戰隊式咁幾個打一個奸角,或者兩溝,咁又自己入場睇啦。

# # #

〈第三部份〉

就咁,有咗上兩部份做基礎,就可以完全唔劇透咁講套戲喇。

搵龍珠既過程,概念係唔錯既,唔算好驚喜,但安排得唔錯,都適合啲角色,同埋編成一隊既角色都有火花。拍得出幾個舞台的特點,而且連結返「第一個十年計劃」同各個角色既背景,編排得唔錯。

尤其鐵男同盾男,佢地兩個已經有多次衝突同矛盾,今次都解決得唔錯,同埋各自連結返去自己既背景;但同樣係佢兩個,好多位都太白太明顯,其實就過火咗少少。鎚男頭兩部獨立的戲都唔得,第三集都唔太啱我口味,但自從嗰套就好似開咗個制咁,今集既安排同樣係有啲估佢唔到,實在係最驚喜最有趣既。粟米仔(綠巨人呀)都係,安排係有啲驚喜同有新鮮感。

同埋,上次就輸咗啦,咁輸咗之後點面對,有咩變化,有咩成長,其實全部人都寫幾好。由被擊敗之後的消沉,到再起,同埋若干running gag,氣氛都拍得唔錯。要退場既角色,以戲裡面唻講我覺得舖得太顯露,但除咗哩樣缺點,其實以成個「十年計劃」唻講,都各自有體面同合適既結尾,都算係咁。

真正唔滿意既,其實係有三樣。

第一,哩部戲本身,節奏有啲問題。上一集未完既事,今集了結得太草草。雖然係要留時間舖今集既發展,但我覺得可以處理得好少少。同埋幾個舞台,有啲係拍得幾好,但有啲又係收得好隨意,整體係有啲鬆散。

第二,高潮決鬥部份係拍得亂同唔好睇,好多角色做啲嘢都好無謂,純粹係為咗俾個機會佢出下場,做少少嘢咁。

第三,哩樣係最嚴重。我一直都講,Marvel Cinematic Universe,每部獨立既戲雖然都係各自既一部作品,但真正的作品係成個宇宙,哩樣先最好睇,「第一個十年計劃」最成功就係哩一點。問題係:「第二個十年計劃」幾個主角,得巫醫有啲特色同棱角,黑衫國王同女機師都非常無味無癮。(蜘蛛仔有潛力,但我覺得要睇多套先;蟻男兩套戲都唔得,但個角色本身唔錯,奈何能力上唔似擔得起成個十年計劃。)

今集哩三巨頭出場,係完全無進步,睇完係對佢地更加無信心。「第一個十年計劃」,四巨頭各具特色魅力,所以可以撐足十年,仍然有故事可以講,唔會悶。哩幾個新巨頭,我暫時係完全睇唔出點樣可以玩多十年。

==

簡單評分:

B+++++++++(☆☆☆☆★)

《Marvel隊長(Captain Marvel)》

"Captain Marvel" Film Poster
(from Wikipedia;Fair Use/Fair Dealing)

其實諗唔到有咩想講,不過今個禮拜無睇其他戲,就即管照講兩句。

杜麗莎隊長 的外型我雖然唔滿意(我平時都 OK 鍾意睇 Brie Larson,但佢的確唔太襯),但哩一點原來大半部戲都無乜所謂(不過到《群英薈第四集》就應該會頗礙眼),所以放到最尾先再講一講。部戲真正的問題是配角太搶眼,主角本身則太無癮太無味道。

單眼佬今集未單眼,後生咗廿幾年,流露出更輕佻一面,做 buddy cop film 的 sidekick 恰如其份,卒之有一整部戲的機會表現個角色。又,雖然依稀都有少少膠,但用 CG 年輕化的效果實在出色,好快已經能夠接受,而且完全無礙其發揮,起碼都做到咁先有價值搞哩啲嘢吖嘛。(再諗起早排套港產《廉政風雲 煙幕》,特技質素直情好似《百變星君》咁,就無謂獻醜啦。)

貓就個個都講,跳過。

Ben Mendelsohn 做變型外星人其實更驚喜,在不同時候有完全不同的氣場,真係會變身。又,雖然喺現實風格的戲已不鮮見,但係喺 MCU 世界裡面,如此「奸角」的背景其實已算有層次,而且整個角色都很討好,又有新鮮感,令人期待佢再次出場。

杜麗莎隊長 又如何呢?前大半部,buddy cop film 的部份是可以的,唔知自己係邊個,迷茫,但又殘留仍是地球人時的性格,演出是不錯,也睇得出 cast Brie Larson 的價值;同單眼佬的尋找自己的旅程,老土得唻其實都有啲火花,有九十年代味,但又有今日的節奏,完全可以收貨。

問題係,之後,知道自己過去,又要做今集的任務,但又如何呢?睇到尾,仍然無角色本身的動力、想法、價值,無英雄之為英雄,甚至無角色之為角色的特質。上面兩個唔再重覆啦,講一路各個角色。鐵男缺乏安全感,盾男會不惜一齊捍衛同伴、正義和自由,綠巨人(粟米?)有自己兩個面向的衝突爭扎,其他有獨立一部戲的可以再慢慢數。

甚至仍未有自己擔正一部戲的 Black Widow 同 Scarlet Witch(希望兩個都會有啦,哩兩個會好想睇。),都有棱有角,有情感有欲望,有血有肉。相反,跟住 杜麗莎隊長 找尋咗兩個鐘,結果都睇唔出佢代表啲咩諗法,佢有咩動力,有咩渴求,等等各樣,全部見唔到。

到力量覺醒,總之好勁,大力,識飛,可以唔開面罩飛上宇宙空間,可以射能量束,總之將一堆好勁既力量塞埋一齊。嗯… 但除咗「好勁」呢?無,再無其他特色個性,打鬥的方法亦無獨特之處。有咩癮呢?而講到哩喥,就要講返 Brie Larson 個外型。文戲的時候係無事,佢表現亦唔錯,但到要表現有幾「英雄」的時候就出事。實在無乜英氣,實在唔係好型。

無辦法,外型係客觀限制,唔係話演技好可以搭救。試下搵 Al Pachino 去做《Terminator》吖,好戲啦係咪?但係真係無可能,完全唔配合,完全另一樣嘢。唔係老咗唔得,後生嗰陣(搵套《Godfather》睇下)都一樣唔得。又或者,Judi Dench 我都鍾意睇,好似 Samuel Jackson 咁用 CG 整返後生,去做下 Black Widow 或者 Scarlet Witch 啦不如。超唔襯。

哩個道理,連 周星馳 都已經示範過。黃一飛 可以係 葉孤城,文雋 可以係 陸小鳯,現實中無話武林高手要高大有型,係你啲凡夫俗子自己妄想諗多咗。咁超級英雄當然都可以無乜英氣既,但客觀效果就係選角唔匹配係唔掂,極端啲會變笑片添。

選角其實係 Marvel Studio 強項,之前十年,鐵男、盾男、羊角神,簡直入型入格到不可替代,粟米仔都係好驚喜,其他全部都唔洗數,總之無出過錯。希望今次係特例,唻緊十年唔好行差踏錯。

==

簡單評分:

B-/C+(☆☆☆★)
(反而 Jude Law 就幾好,都幾襯;Gemma Chan 就無幾多個鏡頭,其實佢好似都幾有趣。)