標籤彙整: Emily Blunt

【偷懶唔諗寫咩系列】本週電影隨口噏兩則:《廉政風雲 煙幕》、《魔法保姆(Mary Poppins Returns)》

其實仲睇咗部修復版《牯嶺街少年殺人事件》。

之前電影節看過,很喜歡。這次修復之後,原本暗到漆黑一片、幾乎不知道在做甚麼的場面,現在都能看到了。沒有調得太光,仍然昏暗,但應看到的細節終於能看了。再看一次都覺得很厲害,用多個角度都能看;人物多到數不清,但仍可拍得條理分明,各有個性;沒有不應該出現的累贅,出現的,都總有原因;其實畫面本身都值得看了。仍想再看。

###

《廉政風雲 煙幕》

其實,只要扮是正正經經拍的港產片,通常都樂意買飛入場支持一下,但可惜通常都失望。這部更不止失望,完全是割凳爛片。

由一開始,張家輝 要搞花臣走佬,其實已經無稽。證人就只是證人,又不是被告(況且,俾人告不代表一定有離境限制。),要縮沙要閃人,總之行出門口就可以了,阻他走反而可能是非法禁錮,何用如此多費周張?走人後,間房冒煙更是無厘頭到極致。放煙有何用呢?有何目的呢?然後,部戲只是俾觀眾睇有煙,其後是無任何事情發生的。那為何要放煙?不知道。(類似問題,戲內不停出現,無頭無尾。)

到法庭戲(好在只有一場)就更好笑。劉青雲 無啦啦何來有 rights of audience (出庭發言權)咁威呢?在法庭隨便行上前,簡直似在屋企客廳。要有戲劇效果,唔係咁做既,唔睇庭都搵套法庭片睇下啦。(同埋,咁大單案又會無記者囉。)又其實,整段都無厘頭至極。第一被告走佬,證人又走佬,唔需要諗現實,諗返一般正常的法庭戲,會如何發展呢?

申請押後,通緝被告,睇下刮唔刮到佢出唻先再算啦。咁就唔洗開庭住,起碼都拖到一頭半個月時間,先再去搵件證人返唻吖嘛。可以拖既嘢,邊個叫你拎出唻講?邊有人咁豬架?押後期間,班廉記咪繼續做嘢囉。聽落都合情理吖,平時啲戲都係咁做咯。要 劉青雲 交戲,唔需要下下行去法庭正中間做場大龍鳯,坐喺 prosecutor 後面,聽下屬匯報,再同前面嗰個講,一樣都可以有戲。

又比如,叫下屬搞份咩「假文件」,其實由頭到尾無拎過俾人睇,只係拎住唻做樣,拋下啫,咁隨便拎份乜鬼都得啦。另一方面,到要呃 袁詠儀 做證人,其實對方打個電話,問一問佢廉記上司、問一問律政司 advising counsel,乜煲都穿啦,邊有得呃呢又?

之後整部戲有幾無厘頭,又細個就識乜乜乜(兼啲特效好核突),無心機再數。

轉講另一件事,究竟想將部戲拍成咩風格、咩感覺呢?一時又法庭戲、查案、搵證據、拉人、睇文件、睇CCTV;一時又兩公婆耍花槍;一時又似拍旅遊特輯,或者介紹移民去/回流澳洲;一時又似拍 007 特務動作片,又爆炸、又滑雪、又開鎗、又直昇機。完全睇到一頭霧水。其實似係,啫係成套都就唻拍完喇,又好似有啲悶,又好似無頭無尾,咁點算呢,整幾場爆炸啦,死幾個人啦,好似有啲嘢睇下,充撐下場面。臨尾仲要夾硬加一幕,懶係有因果報應咁,嘩,難睇到嘔。

==

簡單評分:

E(★)

###

《魔法保姆(Mary Poppins Returns)》

雖然是續集,但第一集超過半世紀前面世,可以當新戲睇。(多過一個人咁同我講,我睇完都覺得係咁,無睇過舊嗰集係完全無所謂。)

不錯,但又沒有甚麼驚喜,都是意料中的樣子。不太喜歡歌舞片,但還好,份量適中,不會只顧歌舞,舖排得也不突兀。畫面拍得漂亮,入場輕鬆一下也算不錯。尤其走入瓷器那一整段,效果很好。(睇圖,舊版似乎都有一段走入畫中?)整部戲,只是不太喜歡 Meryl Streep 那一段。(我承認,九成是偏見。)

只可惜 Emily Blunt 雖好,但不太有魔力,總是差一點點。(搵圖睇,舊版的 Julie Andrews 看似更有神采。)

==

簡單評分:

B(☆☆☆☆)