標籤彙整: Jessica Chastain

【偷懶唔諗寫咩系列】本週電影隨口噏三則:《追龍II:賊王》、《以恩寵之名(Grâce à Dieu)[By the Grace of God]》、《變種特攻:黑鳳凰(X-Men: Dark Phoenix)》

《追龍II:賊王》

鬼捂眼,我一路以為哩套係《火龍》續集,以為起碼有啲動作睇,所以先入場,但原來係《追龍》系列… 上次嗰部「宇宙最強 X 劉華」的超爛片,其史觀甚為特異可笑,故事又爛,若非鬼捂眼真係唔會入場。又,此爛片系列揀咗個名同倪匡名著《追龍》一樣,真係影衰晒。

今集王日日日繼續舐共,史觀當然同樣特異,但後來公安都無乜咁英明神武,反而成件事都係靠皇家香港警察出手(當年都仲未墮落成黑警),明顯未夠政治正確。但更加唔正確,係揀哩個風頭火勢唻上畫,擺明係為中國主子添煩添亂啦,起碼應該禁止佢拍戲五至十年。(拍少幾年爛片,都算造福人類,慳返啲資源。)

啫係,「反送中」除咗啲狗官大話連篇、囂張跋扈之外,主要問題係要保住「唔可以將人引渡返中國」哩一點。而哩樣之所以重要,就係因為北面嗰個不正常國家,佢想點砌你就點砌你啦,總之一切聽黨指揮。

咁套戲其中一點關鍵,就係話張子強(戲裡面當然係用假名啦,但大家都知拍緊邊個)喺香港就曾經脫過罪,之後又未拉到啦。咁其實任何正常制度,有時係會有啲漏網之魚,係唔出奇既,咁你今次有甩漏,制裁唔到佢,下次做好啲囉,無制度係完美無缺既,寧縱無枉,必然會有少少代價。

當然極權共產國家就唔洗玩哩套既,總之佢要你死,問題就只係點捉到你。一落到佢手,黨(同鎗)就係道理,要你死你就死梗啦。公開、公平審訊,人權,制度,喺深圳河以北的迷離境界都真係開玩笑。(臨尾幾隻字要用返匪腔普通話讀先有味道。)

套戲基本上就係原原本本就咁拍出唻,幾乎令人想讚下王日日日咁有膽色:古天樂最後的殺著,就係迫到張子強要著草返中國搏一搏,但係搏唔到啦,咁一拉到就要死喇。其實唔知仲算唔算洩漏國家機密,畢竟國家主席都話唔要司法獨立,但哩個時候拎唻拍戲就擺明別有用心啦。(又,咁佢有黨有鎗,自然可以亂講嘢,佢可以洩漏國家機密,你唔可以。)

==

簡單評分:

U(×)
(奉勸各位唔好入場。)

###

《以恩寵之名(Grâce à Dieu)[By the Grace of God]》

非常好,無論用任何角度睇,都非常有趣。由一個人物開始,慢慢揭開件事,又睇到周圍的人,再流暢地轉去另一個人物,一路擴展,然後又返轉頭。每一個人物都很好,而且有整件事的氣氛、情緒、狀況。雖然,戲中唔少人對信仰的糾結,其實我完全不理解也無感覺,但完全無損欣賞部戲。

人、信仰等等都已多人講,不如講抗爭。

抗爭,其實是由三個主角中最溫和、最虔誠的教徒開始。溫和傳統的和理非,當然是由寫投訴信開始,開始能面對自己受的傷害,嘗試在教內抗爭,但明顯一直俾人耍。而且你幾溫和都好,總係有啲鄉愿反而埋怨你搞事。到諗住追究,自己件事已過時效,搵到一個又唔肯企出唻,卒之都係用返寫信作結,寫信報案,照搵公權介入,搞大件事。

到轉去第二個無神論者,最初都覺得算啦,但後來發現搞細路神父仲有接觸細路,就開始激啲喇,都係佢去搵傳媒插手,同開始搞組織。溫溫吞吞唔得,都係要有多啲行動。之後都一路係組織裡面激啲嗰個,但其實更有趣係喺戲中提出最激的手段,組織裡面所有其他人都反對,佢本來都仲想去,但後來律師話有風險,唔值得搞,就無搞喇。

中途又有第三個主角,早兩個都係生活穩定的中產,哩個係邊緣人,將自己人生所有不如意都歸咎於細個俾神父搞。到後段,其實令人懷疑,佢究竟係想抗爭以達成目的,定係抗爭已經變成目的、抗爭已經係佢人生唯一有啲意義既事。(要講套戲有少少瑕疵,就係最尾無處理到哩點,臨尾好似變返主流一般人,避開咗個問題。)不過,又無壞事,佢諗乜,有咩所謂呢?目標一致其實都夠喇。

(其實仲有一個,都算主要,但又著墨不太多,算半個啦。)

後來有階段性成果,激既想再去盡啲,溫和保守的想見好就收,有人只想退落唻回復普通生活。就算完全不理本片的主題,這抗爭群像都好好睇。

==

簡單評分:
A++(☆☆☆☆☆)

###

《變種特攻:黑鳳凰(X-Men: Dark Phoenix)》

睇完上集《《變種特攻:天啟滅世戰(X-Men: Apocalypse)》已經知,20th Century Fox 已經搞唔掂哩個系列,心急求成,以為搞得大就會好,完全忽略咗要慢慢舖的過程。今集完全有齊哩啲弊病,角色行動一時一樣,無啦啦加外星力量又好奇怪,成部戲幾近一無是處。現時,只期待經廸士尼收購後,此系列回歸 Marvel 宇宙,可以重新唻過。

其實交叉人系列,最好睇是用超級英雄故事包裝社會議題,故事內就圍繞異能人同一般人類之間的關係,影射的就是種族議題。漫畫似乎比較豐富,但美漫分鏡太亂睇唔慣,電影就一路都集中講光頭教授同磁力人的路線之爭,一邊係和理非左膠大愛,一邊係我族優先的勇武抗爭,咁當然多數時間都係王道主流會佔上風,但偏鋒其實亦不算真正反派,只是手段不同的反英雄而已。

而今集,多少露出一啲陰暗面的光頭教授,其實亦承認(但我印象中佢立場一直如此),和理非並非目的,只是要有辦法同人類共存,咁哩個形象其實係用唻保護多數異能人。另一方面,連磁力人都已經放低咗,同一班手下隱居一隅,總之你唔搞我我唔搞你咁就算喇。一下子,成個系列既核心衝突就無咗。

變咗今集要面對既,係由上面落唻,入侵正常世界的外星妖邪。咁你心靈感應又好控制又好大愛乜叉都好啦,當然係無意義既,外星妖邪一心要消滅你,講道理又有咩用呢;但另一方面,勇武亦唔見得有效果,因為對手比你更孔武有力。中間無謂細節跳過,到臨近最後決戰喇。雙方合作,都唔係無用既,尤其勇武抵抗係收拾到對方一啲嘍囉,但外星勢力頭目一出手,立即就收皮。

到哩邊最強的磁力人出手,始終係主角之一,都頂到一陣既,總算都拖到些少時間,但一樣係贏唔到。人力有時而盡,唔係話你努力啲就補得到個差距,但或者佢都心知肚明,不過點都要盡下力,又其實或者,意義就係拖多嗰一陣。拖一陣,好似無乜特別,但係都可以好有用。奮勇抵抗(幸好唔洗犧牲),就算打唔低敵人,都總算悲壯。所以磁力人都係主角。(而且型過光頭教授。)

卒之,咁戲就一定會贏得返,但都唔係完全無厘頭。外星武力太強大,無得打架喇;你無得打,咁搵多個外星武力同佢打囉。目的係要贏,係要砌低敵人,手段唔緊要,唔係自己手贏返唻都唔緊要。光頭教授卒之拉攏返有外星力量附身的珍灰,用更強大的外星力量,輾壓妖物,一揮手就令嘍囉灰飛煙滅,外星妖婦喺絕對武力面前亦無力抵抗。

贏得到的手段,就是好手段,有比敵人強大的人做盟友,盟友出手幫你打贏,都係贏。異能有好多種,力量都有好多種,打得贏係高強,叫得到人幫你打贏一樣都咁有用。咁所以光頭教授都仲係主角。一如大雄好廢,但大雄有叮噹,所以大雄係主角。小智都跟啱大佬,有比卡超照住,所以咁多輯都仲做緊主角,仲成日換女伴添。

兩個角色、兩條路線的故事,應該仲有得講落去,只不過換咗公司,遲幾年應該會換人再重新唻過。

==

簡單評分:
C-(☆☆★)
(難得有 Jessica Chastain 加盟,但個角色好廢,可惜。希望遲下會有其他角色搵佢。)

【偷懶唔諗寫咩系列】本週電影隨口噏五則:《莫莉遊戲(Molly’s Game)》、《霓裳魅影(Phantom Thread)》、《最後的食譜(ラストレシピ ~麒麟の舌の記憶~)》、《盜墓者羅拉(Tomb Raider (2018))》、《竊密風暴(Mark Felt: The Man Who Brought Down the White House)》

《莫莉遊戲(Molly’s Game)》

Aaron Sorkin 寫對話(或演說)實在有一手,角色講起話來如連珠炮發,你來我往,刺激過癮,如常精彩;Jessica Chastain 被削人工時、開庭前及答辯前「神眼」Idris Elba 試探和猶豫、Idris Elba 在會面時發脾氣、溜冰後在場邊由 Kevin Costner 作濃縮版心理治療(由超人地球老豆,再到 Jessica Chastain 老豆,快要包攬所有型老豆角色了。)等幾場,非常緊湊,但火花過後,一離開兩人對話的場景(或一人大發議論的場景),就急速跌 watt。

不差,不難看,上述講的場面亦頗精彩,但撐不起部戲。整部戲在承接、展開的部份比較貧弱。例如 Molly 到紐約開檔,只得開頭策劃和些許招攬,之後一跳就跳到牌局興旺成功了。如此這般的情況,戲中不少,跳躍太快。篇幅有140分鐘,其實應該可以分配得更好,舖得更實在。

==

簡單評分:

B(☆☆☆★)

###

《霓裳魅影(Phantom Thread)》

找不出可挑剔之處,但同時亦找不到任何可連繫之處,感覺空洞,不好說。

==

簡單評分:

B/B+(☆☆☆★/☆☆☆☆)

(實在想爆頭都再想不出有其他想說的。)

###

《最後的食譜(ラストレシピ ~麒麟の舌の記憶~)》

💖💖💖💖💖 宮崎あおい 好萌 💖💖💖💖💖
💖💖💖💖💖 宮崎あおい 好萌 💖💖💖💖💖
💖💖💖💖💖 宮崎あおい 好萌 💖💖💖💖💖

實在是唯一入場理由,其實有 💖 宮崎あおい 💖 看就很滿足了,不滿足之處就是她戲份太少而已。(Casting 肯肯定是看過 💖 宮崎あおい 💖 版的里中静流[《ただ、君を愛してる》],今次想看她穿和服拿相機吧,實在是職權亂用,也實在是亂用得太好!Good Job!好萌!)

除此以外,部戲未至於一無是處,但也相差無幾,歷史部份的故事有點牽強,現在部份的故事又太陳舊而且太明顯。嗯,其實專心拍多一點 💖 宮崎あおい 💖 就好了嘛,其他部份都是多餘的。

另,看戲時有點無聊趣事,出工作人員表時觀眾幾乎同聲「Woooo」了一下,因為剛好出了這行字:「企画 – 秋元康」!!!!「百足咁多爪」絕對不足以形容肥秋,他根本是長期住精神時間房(精神と時の部屋),一日有多過廿四小時的吧!

這閒話實在太無謂,臨尾轉回正題:
 
 
 
 
 
 
 
 
 
 
 
 
 
 

💖💖💖💖💖 宮崎あおい 好萌 💖💖💖💖💖

==

簡單評分:

C- -(☆☆★)

###

《盜墓者羅拉(Tomb Raider (2018))》

💖💖💖💖💖 Alicia Vikander 好可愛 💖💖💖💖💖
💖💖💖💖💖 Alicia Vikander 好可愛 💖💖💖💖💖
💖💖💖💖💖 Alicia Vikander 好可愛 💖💖💖💖💖

腦殘粉大概就是如此,實在無太多其他感想。故事普普通通,過得去,雖然 卑弥呼 的部份作得有點勉強,但如此系列根本不用太認真;不過忍不住要吐槽,既然家族如此有米,老豆為何要到香港找來路不明的船夫,為何不買多幾張衛星圖片先搞清楚位置,再用大型直昇機去就好了嘛,尤其是……後來奸角集團都是用直昇機的嘛!(奸角果然比較會用腦。)

動作場面、盜墓過程、古墓機關,無新意且牽強,但 💖 Alicia Vikander 好可愛 💖,勉強過得去;倒是初段在英國街頭單車追逐,其實更有趣味。(送外賣時,那怕羞餐廳少東角色其實也不錯嘛,可惜應該無下文了。)

==

簡單評分:

B(☆☆☆★)

###

《竊密風暴(Mark Felt: The Man Who Brought Down the White House)》

失敗的案件重演式紀錄片。

事件講述得差,跳過太多細節,完全當人清楚明白水門事件和深喉爆料的過程,都算,或許也真的應該知道,八九成人也都知道;問題是看了兩小時,竟不似有更瞭解 Mark Felt 這個人,這就太失敗了。如果想不透這個人,無甚新意想法,不如不要拍吧,何苦呢?

==

簡單評分:

C- -(☆☆★)

《槍狂帝國(Miss Sloane)》

"Miss Sloane" Film Poster
(from Wikipedia;Fair Use/Fair Dealing)

「後生仔始終係後生仔,急啲。」

「摸戒指呢吓小動作,係我喺最近五百鋪牌入面,特登加上去嘅。」

「你望出去睇下見唔見到大嶼山?我聚賭,至多咪罰三千。」

「個雞棚,我搭咗成年喇。」

(以上幾句憑記憶同上網搵一搵唻寫,無睇片,有幾準確唔包。)

並非講笑,上面幾行《賭神1+2》名句,已經劇透咗,而且非常嚴重,不過明就明,唔明就算啦。其實,一開場Jessica Chastain向觀眾自白那幾句,都已經預告了如此安排,條橋一早放在你面前,戲中亦留了很多手線索。有時,會刻意偷幾步,令觀眾緊張;有時又放水,提示提得很明顯,等觀眾追上去。收,放,收,放,節奏就是如此保持緊張刺激。

Political Thriller,政治的部份其實完全不重要,只是活動的舞台,總之有主角及伙伴(主角正邪莫辨,但總之代表「正義」那一方)、有對手(奸黨),雙方在檯下對奕、刺探,陰謀舞弄擺佈其他人和事。是否政治,其實完全無所謂,改成球賽、商業、捉棋、賭局,甚麼都可以。

重點在後面「Thriller」這個字。中文,從來未見過有妥貼的佳譯。幾款譯法都有個「驚」字,已經錯到離譜,簡直得人驚。Thriller當然源於「thrill」:刺激、興奮,氣血上湧,腎上腺素激增,如電流過全身,肌肉震顫,屏氣凝神——應作此解。Thriller不一定要驚、不需要靠嚇,可以是懸疑、可以是動作、可以是節奏,手段不重要,重點是結果:要令觀眾緊張刺激

脫去「政治」的外衣,不過就是一套「爆谷戲」而已。

手段是否合理真實,計謀鬥法是否高智,或只是編劇妄想和出千,其實無所謂。賭神如何變出一隻「階磚三」,幾時訂購他的「德國液晶顯影隱形眼鏡」,統統無所謂。總之,配合當下的氣氛節奏,發哥又夠型、有氣勢、壓到場——在銀幕出現那一陣子爽過,就夠了,不需要深究。

配角如Gugu Mbatha-Raw、Alison Pill固然不錯,但其實成敗關鍵只在Jessica Chastain能否撐得起部戲——型爆。入場看她型,理由已經很充分。製作人對這此賣點亦了然於胸,整部戲由劇情到畫面,所有一切,都只是為了令個角色夠型。亦正亦邪,非常有魅力,簡直有一股俠氣。

如此角色,當然會有性格「缺憾」,不少情節、衝突都是圍繞這一點來發展。不過,最精彩的處理是不去深挖這角色的內心、背景、動機。(帶過是有的,但無花無謂時間過份探討。)到最後,她為何要做這件,觀眾一無所知(希望不要有續集越拍越衰;但應該不用太擔心,因為票房仆直。),總之就是做咗、型咗,了結這件事,瀟洒離開。

近年的英雄/反英雄,太沉迷於表現其「人性」,反而變得面目模糊。偶爾反其道而行,拍一個不流露內心感情、線條分明的俠客,清新可喜。

==

簡單評分:

A-(☆☆☆☆★)