標籤彙整: Karen Gillan

《復仇者聯盟4:終局之戰(Avengers: Endgame)》

"Avengers Endgame" Film Poster
(from Wikipedia;Fair Use/Fair Dealing)

(令和元年第一篇文!)

無咩其他戲上又想講,咁避唔開都係佢喇,但劇透係非常討厭,而且會被追殺,所以要好小心講。篇文分三部份:第一,超簡短盤點一下有咩已經知道,肯定可以講既;第二,從結構、常理,可以推斷若干必然會發生的事,及若干可能會出現的發展(如果想完全一片空白咁入場,連哩部份都唔好睇喇);第三,咁上兩部份就可以界定有咩可以安全咁講,哩部份就可以喺不超逾界線的情況,約略講下覺得部戲點。

# # #

〈第一部份〉

之前廿幾部戲,全部就係帶到唻今次哩集《群星薈4》,哩集應該算係「第一個十年計劃」既收結,而「第二個十年計劃」,已知會有蜘蛛仔、會有黑衫國王、會有女機師,第三個最近先出場唔計啦,前兩個上次唔見咗,但肯定會有辦法出返唻,哩樣係明顯一早知道既。

預告片,又見到今集有咩出場人物,唔重複喇,都係大家都知道既。

# # #

〈第二部份〉

上回講到,手套佬集齊六粒龍珠(點解唔係七粒…),消滅咗宇宙一半生命(其實係好無聊既,轉個頭就生得返咁多出唻啦),一眾英雄主角係輸咗,咁今集一定要贏返,如果唔係唔使拍啦,問題只係點贏法,同埋有無/有咩代價,而所謂贏,當然唔止係指打贏,係要將宇宙回復原狀/將被消滅既生命復原,但之前廿幾部都無其他法寶,咁所以一定要去搵/搶龍珠喇。(對面都知你係想要龍珠架嘛,咁當然唔會咁易俾你拎到手啦。)

又,都話只可能係搵龍珠搞返掂件事,咁其實都唔止上面講話已經知道會有新戲、新劇上嗰啲角色,基本上所有用龍珠整唔見既人物,都會用龍珠叫返返唻。咁當然叫返返唻,又有無其他下場就唔一定喇,哩啲嘢講唔埋既。

拍咗十年,角色越唻越多,要一部戲拍晒其實好難,上次都提過死剩嗰啲主要就係「第一個十年計劃」既主角,佢地要負責埋尾。(調轉諗,邊啲唔係舊嗰批,但又可以留低,就一定另有用途喇。)但人物其實仍然好多,無可能全部人經常一齊行動,咁所以都可以預想,要同上一部一樣,分幾個舞台行事。

真人電影同漫畫唔同,漫畫可以不停reboot,又可以moving time frame咁樣改下設定,人物想用幾耐就幾耐;但真人始終會老,同埋都無乜可能咁長張約無限套咁拍,咁所以「第一個十年計劃」既角色,無可能全員留低,帶去「第二個十年計劃」。部份可以帶到去下一個十年,但唔會係全部。(當然,我係假設佢地唔會想中途換人接力咁拍,我記得有一個角色係換過人既,但嗰次似係意外,唔係計劃。)

要退場既角色,當然有好多唔同可能既,退隱又得,死又得,失蹤又得,昏迷又得,雪藏冷凍又可以(唔係CCTVB藝員嗰啲,係真係雪住個人嗰啲),或者唔係完全退晒,下個十年耐唔耐出唻做配角都得(甚至變身奸角都可以添啦)。詳情就唔可以講,唔可以講有幾多,係邊個,下場係點,但入場前必然係預計到,一定會有哩啲事發生,爭在係邊一樣架啫。

又,雖然話哩套係「第一個十年計劃」既結束,但其實「第二個十年計劃」都已經開始緊(起碼已經有啲新角色起跑咗),咁哩套除咗收頭十年個尾,就又可以帶動下一個十年,不過究竟會唔會做,或者會做幾多,就好難估,可能會等下一部先真係著手搞都唔定。

同埋,高潮決鬥一定會有,但究竟係好似上一集咁大軍對陣,定係戰隊式咁幾個打一個奸角,或者兩溝,咁又自己入場睇啦。

# # #

〈第三部份〉

就咁,有咗上兩部份做基礎,就可以完全唔劇透咁講套戲喇。

搵龍珠既過程,概念係唔錯既,唔算好驚喜,但安排得唔錯,都適合啲角色,同埋編成一隊既角色都有火花。拍得出幾個舞台的特點,而且連結返「第一個十年計劃」同各個角色既背景,編排得唔錯。

尤其鐵男同盾男,佢地兩個已經有多次衝突同矛盾,今次都解決得唔錯,同埋各自連結返去自己既背景;但同樣係佢兩個,好多位都太白太明顯,其實就過火咗少少。鎚男頭兩部獨立的戲都唔得,第三集都唔太啱我口味,但自從嗰套就好似開咗個制咁,今集既安排同樣係有啲估佢唔到,實在係最驚喜最有趣既。粟米仔(綠巨人呀)都係,安排係有啲驚喜同有新鮮感。

同埋,上次就輸咗啦,咁輸咗之後點面對,有咩變化,有咩成長,其實全部人都寫幾好。由被擊敗之後的消沉,到再起,同埋若干running gag,氣氛都拍得唔錯。要退場既角色,以戲裡面唻講我覺得舖得太顯露,但除咗哩樣缺點,其實以成個「十年計劃」唻講,都各自有體面同合適既結尾,都算係咁。

真正唔滿意既,其實係有三樣。

第一,哩部戲本身,節奏有啲問題。上一集未完既事,今集了結得太草草。雖然係要留時間舖今集既發展,但我覺得可以處理得好少少。同埋幾個舞台,有啲係拍得幾好,但有啲又係收得好隨意,整體係有啲鬆散。

第二,高潮決鬥部份係拍得亂同唔好睇,好多角色做啲嘢都好無謂,純粹係為咗俾個機會佢出下場,做少少嘢咁。

第三,哩樣係最嚴重。我一直都講,Marvel Cinematic Universe,每部獨立既戲雖然都係各自既一部作品,但真正的作品係成個宇宙,哩樣先最好睇,「第一個十年計劃」最成功就係哩一點。問題係:「第二個十年計劃」幾個主角,得巫醫有啲特色同棱角,黑衫國王同女機師都非常無味無癮。(蜘蛛仔有潛力,但我覺得要睇多套先;蟻男兩套戲都唔得,但個角色本身唔錯,奈何能力上唔似擔得起成個十年計劃。)

今集哩三巨頭出場,係完全無進步,睇完係對佢地更加無信心。「第一個十年計劃」,四巨頭各具特色魅力,所以可以撐足十年,仍然有故事可以講,唔會悶。哩幾個新巨頭,我暫時係完全睇唔出點樣可以玩多十年。

==

簡單評分:

B+++++++++(☆☆☆☆★)

《復仇者聯盟3:無限之戰(Avengers: Infinity War)》

"Avengers: Infinity War" Film Poster
(from Wikipedia;Fair Use/Fair Dealing)

(大佬,已經上咗畫幾星期,真心想睇已經入場睇咗,我覺得斷無理由再投訴人「劇透/爆雷」,雖然我未必會講好多劇情,但似乎亦不必再有「警告」呀、「分隔線」呀……等等措施。)

由《鐵男》開始,轉眼十年,Marvel已經拍到《群星薈3》,角色越唻越多,其實頗令人花多眼亂,不過兩年或幾年先一部「群星薈」,熱鬧一下又無乜所謂,反正無期望群戲可以有咩劇情突破或人物刻劃。甚至,(好似都好多人講)其實唔可以當係「一部戲」咁睇。

根本成個 Marvel Cinematic Universe(MCU)先係一件作品,每次「群星薈」就係作品的高潮位。每個角色獨立嗰啲戲呢,其實只係哩件大作品的舖墊;可以獨立當一部部戲咁睇,或者各自有其成長經歷可以睇成一個小系列,係 bonus。啫係好似啲合體機械人玩具咁,重點係合體;啲手手腳腳同個身,可以獨立拆出唻玩,又每件都整得靚,係 bonus,唔係理所當然。

咦?又正好就係 Marvel 同 DC 既差別喇。

Marvel 高明之處,就係每隻細機械人都用心造,分開出、分開賣,仲各自有出配件或進化版,你買齊一套就可以砌隻大合體機械人玩。好可能係大隻啲,1:55,當然就可以精細少少;但因為分開買,又未至於太貴太肉赤,所以容易入場容易追啦。DC就貪搵快錢,一出就想出隻大既,但係太大又搞唔掂啦,可能就出隻 1:144;但太細隻,就算勉強變到形、合到體,拆開唻睇啲細節咪唔靚囉。大概就係咁:一間廠出精品,一間廠出 cheap 嘢。

(其實細都可以精緻既,不過比喻就好難咁計較,總之大概印象係咁啦。)

題外話講完,繼續講哩一幕兩個半鐘既高潮。

歷年出的角色實在太多,有部份就用各種理由使開,但仍然有唔少,只可以拆散幾條線講,完全意料中事。分組選擇都算有趣,效果不太差。各組人馬的經歷,其實都幾正路,有一兩處突兀,其實都是劇情舖排需要,可以算數。唯獨當非洲國王(同佢成個國家)一出場,設定問題就好礙眼——一來太屈機好無聊,二來同其他事太格格不入。

王妹一出場,忽然又要表現佢幾醒目過人,諗到咩新方法;如果又賴係王國黑科技,都算,無得好講;最大問題係,綠巨人博士又好似知道係乜,但又扮白痴諗唔到咁,真係好難睇。更大問題係成個國家設定。明明見到敵人一堆怪物,真係無任何大殺傷力、大範圍武器可以用?做乜要對陣肉搏咁無聊呢?高科技得唻,行事無乜說服力。

而綜合幾條線睇,最大問題其實係無一個人顯示出其「功用」。正派代表無一個人可以表演到、發揮到應有的功能/能力,或者係今集最無癮之處。(不過,蜘蛛仔的角色反而幾好,一來同鐵男互動係唔錯,二來其宅、青年性格係有發揮。又,鐵男拍膊頭封佢做騎士嗰幕我都幾喜歡。)

不過,無發揮其實又係預咗:因為今集要輸架嘛,又點可以有咁好發揮呢?哩樣或者係睇 MCU 最好、但又最唔好之處。未來幾年既作品,都大概 map-out 咗,剩係睇有咩戲會上,已經估到唔少發展:一方面令人安心,另一方面就無驚喜。一早講好咗你聽,打手套人係要打兩集,咁第一集點有懸念帶去下一集?要輸囉。又一早同你講咗,佢係要殺一半人,咁啲主角都起碼「死」一半啦。(不過最終好似唔止一半,我覺得睇落唔多隨機囉。不過樣本細,或者不能作準。)

邊啲可以「死」,邊啲唔可以「死」,其實都係有路捉。

一來,最勁既又唔可以死晒,否則下集無得打。二來,舖得最耐嗰啲一定大部份留低,因為成個大 story arc 就係哩十年舖出唻,由講故事角度睇,要由佢地執手尾。另外,幾個舞台,一定唔會有任何一處係死晒,否則又好難連結。同埋,剩低嗰啲人又要有情感動力下集報仇,咁又可以睇到邊啲要死。用哩幾個條件諗,其實結局真係無乜意外。

==

簡單評分:

B-/C+(☆☆☆★)

(普普通通咁啦。不過始終係上下集,其實哩幕高潮拍得好唔好睇,要睇埋下集先知,但無論單單哩一兩套表現如何,都無損成個 MCU 計劃,實在係舖得好。)
(又,其實可以調轉,將今集主角睇成係 Thanos,成集都係講佢收集六粒龍珠。不過好似好多人講,無乜心機又開多幾段再講。算數。)

【偷懶唔諗寫咩系列】年尾電影隨口噏八則:《逃出魔幻紀:叢林挑機(Jumanji: Welcome to the Jungle)》、《大娛樂家(The Greatest Showman)》、《瑪莉與魔女之花(メアリと魔女の花)》、《大佛普拉斯》、《老獸》、《生命因妳更強(Stronger)》、《亞人(亜人)》、《玩轉極樂園(Coco)》

(新年伊始,繼續懶,年尾年頭幾部戲積積埋埋,每部隨口幾句。)

###

《逃出魔幻紀:叢林挑機(Jumanji: Welcome to the Jungle)》

尤如教育電視般的說教意味也都算了,最大問題是無1995年版本的代入感。由桌遊變成電玩,由親身上陣、親歷遊戲中的恐怖,變成化身電玩角色擁有非常能力,最大的特色和魅力全失。Robin Williams 遭困雨林,是切實渡過數十年,由小孩長成大叔;新作被困少年則一直青年模樣,也渾然不覺時光流逝,只以為過了幾個月。恐怖感差太遠。喜歡看 The Rock,做動作喜劇確是不錯,入場前只打算看他,結果也幾乎只是看他。雖然,Jack Black 也都有趣。

==

簡單評分:

C- – -(☆☆★)
(青少年向中下作,畫面不太差,故事有點悶有點無聊,類似英文台下午校園廢劇,但只要忘記其為「Jumanji 系列」,也都可以一看;不過一想到其為「Jumanji 系列」一員,實在拍不出其精彩處,應該再扣一粒星,或許有點手鬆。)

###

《大娛樂家(The Greatest Showman)》

其實上維基看 P. T. Barnum 生平更有趣一點。

一來不太喜歡歌舞片;二來其歌舞許多時感覺太現代,與戲中時代格格不入;三來將人物和故事簡化太過,太平板單薄,無味。

==

簡單評分:

C-(☆☆★)
(一次過講幾部戲的好處:容易校準幾部戲之間的評比準則。這部,實在不比《新.Jumanji》好幾多。)

###

《瑪莉與魔女之花(メアリと魔女の花)》

雖然已脫離ジブリ(GHIBLI)魔掌,自立門戶開了間「スタジオポノック(STUDIO PONOC)」,但由選材、畫風、配音、表現方法等等等等等等等等各樣,仍是不脫一陣陳舊ジブリ味。如果只是做「ジブリ第二」,那獨立出來又有何意思?一間ジブリ已嫌太多,兩間當然更加無謂。

==

簡單評分:

B- – – – -(☆☆☆
(普普通通,不算差,但無新意;主要是對本作無魄力、無突破最失望,感覺是——無聊。)

###

《大佛普拉斯》

又循慣例,太多人講,好處略過,無新觀點可出賣,不如不寫,只閒話幾句。

導演做旁白,交代內容,甚至配樂;角色也偶爾(好似得一次?)自覺為戲中人;用得恰好,時間準,有趣。可恨。如果懂台語,可能更好看。要靠字幕始終有隔靴搔癢之感。

一頭一尾,實在呼應得好。

想來,那法會也拍得像超渡儀式一樣,漂亮。

我想來想去仍未有結論:最後菜埔回到廢墟,畫面當然毫無疑問出色,本身亦有味道,但整部戲而言究竟好不好呢?原本,在法會上,大佛傳出怪聲,那一下子就完,留下懸念,頗堪玩味;但最尾加這一手,似是敲定了結果,看來又是過了一點點。好或不好,仍未想通。那一幕本身我喜歡,但暫時仍傾向覺得,或許剪走留白更好。

另,一點無聊觀察。「菜埔」一角,英文似乎是譯「pickles」,那中文就似乎是錯字?「埔」字,用於地名,似乎解平地或港口(純粹綜合幾處所見資料);肉乾、瓜果乾,應該是「脯」。很瑣碎,但礙眼,職業病發作。

==

簡單評分:

A(☆☆☆☆☆)

###

《老獸》

本來想講,如此地方背景、人,有點熟口面,好像電影節常見的「量產社會派衝獎作」;但再想,還是有點不同,值得看者,或者就是這少少的不同。那主角,有點討厭,但不至於可憎,一路揭,則更見可憐,有點悲涼。這本身也不算新鮮,但人物心態的矛盾複雜處寫得飽滿,好看。

不過,夢中的白馬意象也都算了,適可而止,路旁那團白色扭動的物體似乎不必。

==

簡單評分:

A-(☆☆☆☆☆)

###

《生命因妳更強(Stronger)》

想跳脫類型模式,但最終仍是落入同一模式

==

簡單評分:

B- – -/C+++(☆☆☆)

###

《亞人(亜人)》

無看過原著,且當這是獨立作品。

廢。

既有方法對付亜人,怎麼一開始不用呢?又,主角的取態太奇怪,無厘頭。不論是對佐藤或對人類,解釋均甚牽強無聊。戲中的計策、行動,亦甚低智。印象實在太差,或許不會去看原著了。

==

簡單評分:

E(☆)

###

《玩轉極樂園(Coco)》

雖然畫面很精彩,但由人到故事,都太熟口熟面,每一個轉折都太意料之中,明顯到過份,普通,且不太深刻。

==

簡單評分:

B+(☆☆☆☆