標籤彙整: Letitia Wright

《復仇者聯盟3:無限之戰(Avengers: Infinity War)》

"Avengers: Infinity War" Film Poster
(from Wikipedia;Fair Use/Fair Dealing)

(大佬,已經上咗畫幾星期,真心想睇已經入場睇咗,我覺得斷無理由再投訴人「劇透/爆雷」,雖然我未必會講好多劇情,但似乎亦不必再有「警告」呀、「分隔線」呀……等等措施。)

由《鐵男》開始,轉眼十年,Marvel已經拍到《群星薈3》,角色越唻越多,其實頗令人花多眼亂,不過兩年或幾年先一部「群星薈」,熱鬧一下又無乜所謂,反正無期望群戲可以有咩劇情突破或人物刻劃。甚至,(好似都好多人講)其實唔可以當係「一部戲」咁睇。

根本成個 Marvel Cinematic Universe(MCU)先係一件作品,每次「群星薈」就係作品的高潮位。每個角色獨立嗰啲戲呢,其實只係哩件大作品的舖墊;可以獨立當一部部戲咁睇,或者各自有其成長經歷可以睇成一個小系列,係 bonus。啫係好似啲合體機械人玩具咁,重點係合體;啲手手腳腳同個身,可以獨立拆出唻玩,又每件都整得靚,係 bonus,唔係理所當然。

咦?又正好就係 Marvel 同 DC 既差別喇。

Marvel 高明之處,就係每隻細機械人都用心造,分開出、分開賣,仲各自有出配件或進化版,你買齊一套就可以砌隻大合體機械人玩。好可能係大隻啲,1:55,當然就可以精細少少;但因為分開買,又未至於太貴太肉赤,所以容易入場容易追啦。DC就貪搵快錢,一出就想出隻大既,但係太大又搞唔掂啦,可能就出隻 1:144;但太細隻,就算勉強變到形、合到體,拆開唻睇啲細節咪唔靚囉。大概就係咁:一間廠出精品,一間廠出 cheap 嘢。

(其實細都可以精緻既,不過比喻就好難咁計較,總之大概印象係咁啦。)

題外話講完,繼續講哩一幕兩個半鐘既高潮。

歷年出的角色實在太多,有部份就用各種理由使開,但仍然有唔少,只可以拆散幾條線講,完全意料中事。分組選擇都算有趣,效果不太差。各組人馬的經歷,其實都幾正路,有一兩處突兀,其實都是劇情舖排需要,可以算數。唯獨當非洲國王(同佢成個國家)一出場,設定問題就好礙眼——一來太屈機好無聊,二來同其他事太格格不入。

王妹一出場,忽然又要表現佢幾醒目過人,諗到咩新方法;如果又賴係王國黑科技,都算,無得好講;最大問題係,綠巨人博士又好似知道係乜,但又扮白痴諗唔到咁,真係好難睇。更大問題係成個國家設定。明明見到敵人一堆怪物,真係無任何大殺傷力、大範圍武器可以用?做乜要對陣肉搏咁無聊呢?高科技得唻,行事無乜說服力。

而綜合幾條線睇,最大問題其實係無一個人顯示出其「功用」。正派代表無一個人可以表演到、發揮到應有的功能/能力,或者係今集最無癮之處。(不過,蜘蛛仔的角色反而幾好,一來同鐵男互動係唔錯,二來其宅、青年性格係有發揮。又,鐵男拍膊頭封佢做騎士嗰幕我都幾喜歡。)

不過,無發揮其實又係預咗:因為今集要輸架嘛,又點可以有咁好發揮呢?哩樣或者係睇 MCU 最好、但又最唔好之處。未來幾年既作品,都大概 map-out 咗,剩係睇有咩戲會上,已經估到唔少發展:一方面令人安心,另一方面就無驚喜。一早講好咗你聽,打手套人係要打兩集,咁第一集點有懸念帶去下一集?要輸囉。又一早同你講咗,佢係要殺一半人,咁啲主角都起碼「死」一半啦。(不過最終好似唔止一半,我覺得睇落唔多隨機囉。不過樣本細,或者不能作準。)

邊啲可以「死」,邊啲唔可以「死」,其實都係有路捉。

一來,最勁既又唔可以死晒,否則下集無得打。二來,舖得最耐嗰啲一定大部份留低,因為成個大 story arc 就係哩十年舖出唻,由講故事角度睇,要由佢地執手尾。另外,幾個舞台,一定唔會有任何一處係死晒,否則又好難連結。同埋,剩低嗰啲人又要有情感動力下集報仇,咁又可以睇到邊啲要死。用哩幾個條件諗,其實結局真係無乜意外。

==

簡單評分:

B-/C+(☆☆☆★)

(普普通通咁啦。不過始終係上下集,其實哩幕高潮拍得好唔好睇,要睇埋下集先知,但無論單單哩一兩套表現如何,都無損成個 MCU 計劃,實在係舖得好。)
(又,其實可以調轉,將今集主角睇成係 Thanos,成集都係講佢收集六粒龍珠。不過好似好多人講,無乜心機又開多幾段再講。算數。)

【偷懶唔諗寫咩系列】本週電影隨口噏兩則:《神奇女郎(Una mujer fantástica)[A Fantastic Woman]》、《黑豹(Black Panther)》

(果然,新年少戲上,賀歲片亦不吸引。或許是慣了定期每週寫字養成的壞習慣,就算無事情想寫一整篇,像本週看的這兩部戲,也不禁找出了一點莫名其妙的共通處:兩部戲都極度好評,雖然實際入場看過也不差,但其實似是「政治正確」的「好評-bias」,多於兩部戲真的精彩如斯。上週剛好寫過「正確」之殘害創作,但其實「正確」或許更殘害評論。[無端要串連舊文,應該也是養成的壞習慣。]不用靠評論食飯,不用永遠「正確」,實為幸事。)

###

《神奇女郎(Una mujer fantástica)[A Fantastic Woman]》

頭開得不錯,男友找信封這小節尤佳。一直發展到去醫院,男友過世,打電話給男友兒子,茫然走出醫院,在街頭迷失那一段氣氛最好。到重回醫院,遭警察問話,查身份證,那一節寫得細,也都還不錯。之後則有點拖,也太刻意,有點堆砌味。負責當壞人那幾個角色,太片面,太平板,太悶。

主角和男友的關係,隱隱約約仍貫穿部戲,由其「靈魂」久不久現身,到爭那隻狗,其實都算是那條線的延伸。其實這條線才是最值得講,最值得寫,但可惜分了心。餐廳,探員,夜場,練歌,上台表演,其實或許可以全部刪掉,或至少減省一些。

那些男友家屬(細佬除外),其實也不用拍成醜化的無聊壞人,講無聊的對白,擠眉弄眼。將現實的困境,拍成只得黑色白色,英雄對抗壞蛋的故事,其實不好看。

==

簡單評分:

C- – (☆☆★)

###

《黑豹(Black Panther)》

同樣,將普通的超級英雄起源故事搬去非洲小國,加一抹異國風情,其實不會令這部一般的Marvel作品變成精彩神作。看動作,看英雄歷險,看「(奸角)王子復仇」,看英雄再起,熟口熟面,但總算節奏明快,畫面好看,合格有餘。(男主角演出不錯;妹亦算有型和有趣。)只是,又有何「突破」呢?想來想去,實在想不出。

坐擁「最強」金屬,有神藥+神甲護體,家財(國庫)無盡,支援的科技力冠絕全球(或可媲美外星科技?)… 等等。哪一樣未見過?大概是盾牌男加鐵男混合加強版,再加一大隊超高科技加強版 007 風特務作後盾,細妹又大概相當於 Q + J.A.R.V.I.S. 人類女裝版。其實以主角設定而言,簡直是過了火位,太屈機根本不好玩,與同一宇宙的其他角色優勢重疊,亦不太能顯出特色。

加上角色性格又正面又正確,嘩,簡直無從「批評」,悶蛋到極致。回看電影宇宙中的(前?)皇牌角色鐵男,財力、科技力和「天然金屬」資源都似乎被遠遠拋離,但仍然比較有趣,因為其人有更多缺點、更多弱點。(其實,這角色也開始越來越「王道」,也越來越悶,魅力開始消褪。)

黑豹呢?無論是創作缺失,或者力求「正確」,總之這角色都太偉光正

太完美無缺的角色,無癮。

==

簡單評分:

B- -(☆☆☆★)