標籤彙整: Michelle Pfeiffer

《復仇者聯盟4:終局之戰(Avengers: Endgame)》

"Avengers Endgame" Film Poster
(from Wikipedia;Fair Use/Fair Dealing)

(令和元年第一篇文!)

無咩其他戲上又想講,咁避唔開都係佢喇,但劇透係非常討厭,而且會被追殺,所以要好小心講。篇文分三部份:第一,超簡短盤點一下有咩已經知道,肯定可以講既;第二,從結構、常理,可以推斷若干必然會發生的事,及若干可能會出現的發展(如果想完全一片空白咁入場,連哩部份都唔好睇喇);第三,咁上兩部份就可以界定有咩可以安全咁講,哩部份就可以喺不超逾界線的情況,約略講下覺得部戲點。

# # #

〈第一部份〉

之前廿幾部戲,全部就係帶到唻今次哩集《群星薈4》,哩集應該算係「第一個十年計劃」既收結,而「第二個十年計劃」,已知會有蜘蛛仔、會有黑衫國王、會有女機師,第三個最近先出場唔計啦,前兩個上次唔見咗,但肯定會有辦法出返唻,哩樣係明顯一早知道既。

預告片,又見到今集有咩出場人物,唔重複喇,都係大家都知道既。

# # #

〈第二部份〉

上回講到,手套佬集齊六粒龍珠(點解唔係七粒…),消滅咗宇宙一半生命(其實係好無聊既,轉個頭就生得返咁多出唻啦),一眾英雄主角係輸咗,咁今集一定要贏返,如果唔係唔使拍啦,問題只係點贏法,同埋有無/有咩代價,而所謂贏,當然唔止係指打贏,係要將宇宙回復原狀/將被消滅既生命復原,但之前廿幾部都無其他法寶,咁所以一定要去搵/搶龍珠喇。(對面都知你係想要龍珠架嘛,咁當然唔會咁易俾你拎到手啦。)

又,都話只可能係搵龍珠搞返掂件事,咁其實都唔止上面講話已經知道會有新戲、新劇上嗰啲角色,基本上所有用龍珠整唔見既人物,都會用龍珠叫返返唻。咁當然叫返返唻,又有無其他下場就唔一定喇,哩啲嘢講唔埋既。

拍咗十年,角色越唻越多,要一部戲拍晒其實好難,上次都提過死剩嗰啲主要就係「第一個十年計劃」既主角,佢地要負責埋尾。(調轉諗,邊啲唔係舊嗰批,但又可以留低,就一定另有用途喇。)但人物其實仍然好多,無可能全部人經常一齊行動,咁所以都可以預想,要同上一部一樣,分幾個舞台行事。

真人電影同漫畫唔同,漫畫可以不停reboot,又可以moving time frame咁樣改下設定,人物想用幾耐就幾耐;但真人始終會老,同埋都無乜可能咁長張約無限套咁拍,咁所以「第一個十年計劃」既角色,無可能全員留低,帶去「第二個十年計劃」。部份可以帶到去下一個十年,但唔會係全部。(當然,我係假設佢地唔會想中途換人接力咁拍,我記得有一個角色係換過人既,但嗰次似係意外,唔係計劃。)

要退場既角色,當然有好多唔同可能既,退隱又得,死又得,失蹤又得,昏迷又得,雪藏冷凍又可以(唔係CCTVB藝員嗰啲,係真係雪住個人嗰啲),或者唔係完全退晒,下個十年耐唔耐出唻做配角都得(甚至變身奸角都可以添啦)。詳情就唔可以講,唔可以講有幾多,係邊個,下場係點,但入場前必然係預計到,一定會有哩啲事發生,爭在係邊一樣架啫。

又,雖然話哩套係「第一個十年計劃」既結束,但其實「第二個十年計劃」都已經開始緊(起碼已經有啲新角色起跑咗),咁哩套除咗收頭十年個尾,就又可以帶動下一個十年,不過究竟會唔會做,或者會做幾多,就好難估,可能會等下一部先真係著手搞都唔定。

同埋,高潮決鬥一定會有,但究竟係好似上一集咁大軍對陣,定係戰隊式咁幾個打一個奸角,或者兩溝,咁又自己入場睇啦。

# # #

〈第三部份〉

就咁,有咗上兩部份做基礎,就可以完全唔劇透咁講套戲喇。

搵龍珠既過程,概念係唔錯既,唔算好驚喜,但安排得唔錯,都適合啲角色,同埋編成一隊既角色都有火花。拍得出幾個舞台的特點,而且連結返「第一個十年計劃」同各個角色既背景,編排得唔錯。

尤其鐵男同盾男,佢地兩個已經有多次衝突同矛盾,今次都解決得唔錯,同埋各自連結返去自己既背景;但同樣係佢兩個,好多位都太白太明顯,其實就過火咗少少。鎚男頭兩部獨立的戲都唔得,第三集都唔太啱我口味,但自從嗰套就好似開咗個制咁,今集既安排同樣係有啲估佢唔到,實在係最驚喜最有趣既。粟米仔(綠巨人呀)都係,安排係有啲驚喜同有新鮮感。

同埋,上次就輸咗啦,咁輸咗之後點面對,有咩變化,有咩成長,其實全部人都寫幾好。由被擊敗之後的消沉,到再起,同埋若干running gag,氣氛都拍得唔錯。要退場既角色,以戲裡面唻講我覺得舖得太顯露,但除咗哩樣缺點,其實以成個「十年計劃」唻講,都各自有體面同合適既結尾,都算係咁。

真正唔滿意既,其實係有三樣。

第一,哩部戲本身,節奏有啲問題。上一集未完既事,今集了結得太草草。雖然係要留時間舖今集既發展,但我覺得可以處理得好少少。同埋幾個舞台,有啲係拍得幾好,但有啲又係收得好隨意,整體係有啲鬆散。

第二,高潮決鬥部份係拍得亂同唔好睇,好多角色做啲嘢都好無謂,純粹係為咗俾個機會佢出下場,做少少嘢咁。

第三,哩樣係最嚴重。我一直都講,Marvel Cinematic Universe,每部獨立既戲雖然都係各自既一部作品,但真正的作品係成個宇宙,哩樣先最好睇,「第一個十年計劃」最成功就係哩一點。問題係:「第二個十年計劃」幾個主角,得巫醫有啲特色同棱角,黑衫國王同女機師都非常無味無癮。(蜘蛛仔有潛力,但我覺得要睇多套先;蟻男兩套戲都唔得,但個角色本身唔錯,奈何能力上唔似擔得起成個十年計劃。)

今集哩三巨頭出場,係完全無進步,睇完係對佢地更加無信心。「第一個十年計劃」,四巨頭各具特色魅力,所以可以撐足十年,仍然有故事可以講,唔會悶。哩幾個新巨頭,我暫時係完全睇唔出點樣可以玩多十年。

==

簡單評分:

B+++++++++(☆☆☆☆★)

【偷懶唔諗寫咩系列】本週電影隨口噏兩則:《蟻俠2:黃蜂女現身(Ant-Man and the Wasp)》、《弊傢伙 撻錯咗(Cherchez la femme)[Some Like It Veiled]》

《蟻俠2:黃蜂女現身(Ant-Man and the Wasp)》

之前只曾在寫《盾牌男3》的時候順帶提到:其實我覺得第一集《蟻人》拍得麻麻地;練功過程重複且太長,後段受篇幅所限,敵人和結尾只能草草收場。今集卒之可以跳過上集之弊處,直入戲肉,果然比較好。父女、母女等親子情節暫且不理,整部戲都集中寫單線三/四方追逐,以動作和特技場面為軸,以丑角和笑料為輔,目標明確,爽快直接,不錯。

不過 Michael Douglas 不停將事物變大變小,兼有縮小/變大隊道,實在太似拍《叮噹》真人版,應該只是偏見,但感覺有點怪,似乎用得太濫;又,將車縮小收起,用的時候變大,有一套多款車種可選,博士,博士個女,縮小,變大… 莊子?膠囊公司(Capsule Corporation/カプセルコーポレーション)?非常有既視感。《蟻人》漫畫不知有否如此道具?有則可能早過《龍珠》。

雖然,誰先誰後其實也無所謂。反而是,這變大/變小的把戲,還可以玩多久?拍了兩集,其實感覺已有些許重複,可以怎樣走落去?上一集講到如此可怕的量子尺度世界(雖然最終無事),今集忽然用《Interstellar》式的出術手法就蒙混過去,最後的奸角就隨隨便便擺平了… 雖然角色設計有趣,中途本來都寫得不錯,但收得馬虎,似乎是這系列另一長期弊病。

好在親子/前妻部份尚算清新(其實可能是演得自然,多於材枓好),笑料亦算足夠及好笑,保安公司一伙雖則典型但效果不錯。講來講去,這部根本是動作笑片。(講開,好似以前睇過?嗯… 《Honey, I Shrunk the Kids》?結尾那一幕更加似。同埋,都係,好《叮噹》。)

==

簡單評分:

B+(☆☆☆☆)

(補兩句:Hannah John-Kamen 的 Ghost 很有型;戲名特別提的 Wasp 則存在感薄弱,而且吸引力接近零;反而 Michelle Pfeiffer,特技後生版暫且不理,但現代版一出場仍然令人「WOW!!!」,又型又可愛,搶鏡至極,艷壓全場。噢,其角色不就是原祖 Wasp 嗎?嗯,戲名可能講佢。唔再做貓女,轉會過檔做黃蜂女啦不如。至於個女,可以放埋一邊,下次唔好出場喇。)

###

《弊傢伙 撻錯咗(Cherchez la femme)[Some Like It Veiled]》

失敗作。

立意良好,發想亦唔差。回國後宗教狂熱發癲大佬,禁錮本要聯合國實習的細妹,自由派細妹男友著罩袍見女友,反而勾引咗大佬。非常傳統的錯摸橋段,串插笑料,用來講宗教呀、世俗呀、家族呀、政治呀等等諸如此類問題。問題係:其實有乜鬼好講呢?

一來,用現代角度,根本只得一種方向可以講。二來,就算同一方向,取態激烈程度本來亦可以有分別,由肯定宗教有若干意義,但謂應該世俗化,到覺得宗教根本無謂兼迷信,千差萬別,但拍成主流電影又不可能太激烈,既難以取悅觀眾,又太難收科。結果,取態必然溫和到震,溫溫吞吞。

而取態既然如此,則可以講的事情又更少了,流於空洞。結果,只能用各種危險、追逐充撐過去。到尾,隨隨便便搞一場大逃亡,正面衝突不夠十秒,就草草完場。

==

簡單評分:

C- -(☆☆★)